Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 307 Hüküm no: 300 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Afife bt. Ahmed ile boşandığı eşi İsmail’in birbirlerinin zimmetini ibra ettikleri Ferâgat Mahmiye-i İstanbul’da Debbâğ Yunus mahallesi sâkinelerinden olup zâtı umdetü’l-müderrisîni’l-kirâm Ahmed Efendi b. Yusuf Efendi ve Mustafa Ağa b. Abdurrahman nâm kimesneler ta‘rîfleriyle mu‘arrefe olan Afife bt. Ahmed nâm hatun meclis-i şer‘-i hatîr-ı lâzımü’t-tevkīrde zevc-i sâbıkı bâ‘is-i hâze’l-kitâb İsmail Efendi b. Abdullah nâm kimesne mahzarında ikrâr-ı tâm ve takrîr-i kelâm edip mezbûr İsmail Efendi zimmetinde mütekarrer ve ma‘kūdün-aleyh otuz iki guruş mehr-i müeccelimi ve nafaka-i iddet-i mu‘ayyene-i ma‘lûmemi tamâmen bana edâ ve teslîm ben dahi ber-vech-i muharrer yedinden ahz u kabz eylediğimden sonra menzil icâresinden ve cihet-i karzdan ma‘lûmü’l-mikdâr hakkım vardır deyü taleb ve da‘vâ sadedinde olup beynimizde münâza‘ât-ı kesîre cereyân etmiş idi, el-hâletü hâzihi beynimizde muslihûn tavassut edip da‘vâ-yı mezkûremden beni mezbûr İsmail Efendi ile yüz guruş üzerine inşâ-i akd-i sulh eylediklerinde ben dahi sulh-ı mezkûru kabûl eylediğimden sonra mezbûr İsmail Efendi Hatîb Muslihiddin Vakfı’ndan olup mahalle-i mezbûrede vâki‘ bir tarafdan Zeyneb Hatun menzili ve bir tarafdan Hasan Dede menzili ve bir tarafdan es-Seyyid Mehmed Emin Ağa bahçesi ve bir tarafdan tarîk-i âm ile mahdûd ma‘lûmü’l-müştemilât bir bâb vakıf menzilden üç sehm i‘tibâriyle mutasarrıf olduğu iki sehm hisse-i şâyi‘anın bir sehm-i şâyi‘ini bâ-ma‘rifet-i mütevellî yüz guruş bedel mukābelesinde bana ferâğ ve tefvîz ben dahi ber-vech-i muharrer tefevvüz ve kabûl eylediğimde mezbûr İsmail Efendi bedel-i ferâğ-ı mezkûr yüz guruşu bedel-i sulh olan meblağ-ı mezbûr yüz guruşa takas ve mahsûb eyledikde ben dahi mukāssa ve kabûl edip husûs-ı mezkûra ve târîh-i kitâba gelince sâir beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 S sene 1153. Şuhûdü’l-hâl: Mustafa Efendi b. Ali Efendi, İbrahim b. Ali, Mustafa Ağa b. Abdurrahman, umdetü’l-müderrisîni’l-kirâm Ahmed Efendi b. Yusuf Efendi, el-Hâc Abdurrahman Efendi b. Musli, Mehmed Ağa b. Mehmed