Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 308 Hüküm no: 301 Orijinal metin no: [43b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Yusuf’un eşi Mehmed Emin’den muhâlaa yoluyla boşandığı Muhâla‘a Mahmiye-i İstanbul’da Karagümrük kurbünde Ali Paşa’yı atîk mahallesinde sâkine ve zâtı zeyl-i vesîkada isimleri mastûr İsmail b. Süleyman ve Berber Mustafa Çelebi b. Hasan nâm kimesneler ta‘rîfleriyle mu‘arrefe olan Çorbacı zevcesi demekle şehîre Fâtıma bt. Yusuf nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka fahrü’l-kuzâti’l-kirâm Mehmed Emin Efendi b. İbrahim Efendi mahzarında ikrâr-ı tâm ve takrîr-i kelâm edip mezbûr Mehmed Emin Efendi ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Emin Efendi ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete ve beynimizde ma‘lûm yirmi guruş mutâlebesine ve sâir târîh-i vesîkaya gelince ahz u i‘tâ ve mu‘âmelât-ı şettâ hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebâtdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 21 S sene 1153. Şuhûdü’l-hâl: Fahrü’l-müderrisîni’l-kirâm Mehmed Ma‘sum Efendi eş-şehîr bi-La‘lîzâde, Mustafa Efendi b. Ebubekir Efendi, Mustafa Efendi b. Ali Efendi, fahrü’l-küttâb İbrahim Efendi, fahrü’l-kuzât Mehmed Tayyib Efendi b. Ömer Efendi, Mehmed Tahir Çelebi b. Ömer Efendi, fahrü’l-huffâz Hâfız Mehmed Efendi b. Mehmed Efendi, Mücellid Halil Çelebi b. Abdülbaki, Mustafa Çelebi b. Hasan, Abdullah Çelebi b. Ali, İsmail Çelebi b. İsmail, Mehmed Efendi b. Osman, İbrahim Efendi b. Mustafa Ağa