Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 309 Hüküm no: 302 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe ve Hatice Hatun’un evlerini Saime Hatun’a sattıkları Mübâya‘a Mahmiye-i İstanbul’da Elvanzâde mahallesinde sâkin Ahmed Beşe b. Mustafa nâm kimesne ile zâtı Ahmed b. Şa‘bân ve Berber el-Hâc Ali b. Mustafa nâm kimesneler ta‘rîfleriyle mu‘arrefe olan Hadîce bt. Mustafa nâm hatun meclis-i şer‘-i şerîf-i enverde bâ‘isetü hâzihi’l-vesîka Saime bt. Hasan b. Abdullah nâm hatunun sadrî kebîr oğlu ve tarafından husûs-ı âti’z-zikri tasdîka vekîl olduğu ber-nehc-i şer‘î sâbit olan es-Seyyid Mehmed b. es-Seyyid Ömer nâm kimesne mahzarında her biri ikrâr-ı tâm ve takrîr-i kelâm edip akd-i âti’z-zikrin sudûruna değin irsen ve şirâen yedimizde mülk ve hakkımız olup mahmiye-i mezbûrede Karabaş mahallesinde vâki‘ bir tarafdan Berber Ahmed Çelebi mülkü ve iki tarafdan Medîne-i münevvere Vakfı’ndan arsa-i hâliye ve bir tarafdan tarîk-i âm ile mahdûd fevkānî iki bâb oda ve bir kenîf ve bir bi’r-i mâ ve bir mikdâr havluyu müştemil mülk menzilimizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî be‘y‘-i bâtt-ı sahîh-i şer‘î ile müvekkile-i mezbûre Saime Hatun’a yüz elli guruşa bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz elli guruşu müvekkile-i mezbûrenin yedinden bi-kadri’l-hısâs ahz u kabz eyledik ba‘de’l-yevm menzil-i mahdûd-ı mezkûrda bizim kat‘an alâka ve medhalimiz kalmayıp müvekkile-i mezbûre Saime Hatun’un mülk-i müşterâsıdır keyfe mâ yeşâ ve yehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 S sene 1153. Şuhûdü’l-hâl: Ahmed b. Şa‘bân, Berber el-Hâc Ali b. Mustafa, Abdullah Beşe b. Abdullah, Solak Mehmed Ağa b. İbrahim, Manav İsmail b. Abdullah