Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 310 Hüküm no: 303 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa’nın İbrahim Efendi’ye sattığı çiftlik ve arazi ücretinden kalan bakiyenin İbrahim Ağa tarafından ödendiği Mübâya‘a Mahmiye-i İstanbul’da Yenibahçe kurbünde sâkin zahrü’l-eşbâh Eminzâde Mahmud Ağa b. el-Hâc Ahmed Ağa b. Abdullah tarafından ber-vech-i âtî vekâlet iddi‘â eden es-Seyyid Abdulkadir Ağa b. Hacı Derviş meclis-i şer‘-i hatîr-ı lâzımü’t-tevkīrde Galata pâyesiyle sâbıkā Revan kādısı olan fahrü’l-mevâli’l-izâm sâhib-i hâze’l-kitâb Müftîzâde fazîletli İbrahim Efendi b. el-merhûm Ahmed Efendi mahzarında üzerine da‘vâ ve takrîr-i kelâm edip müvekkilim mûmâ-ileyh Mahmud Ağa yedinde mülk ve hakkı olup vilâyet-i Rumeli’nde medîne-i Yenişehir Fener’e tâbi‘ Sarıcalar nâm karyede vâki‘ lede’l-ahâlî ve’l-cîrân ma‘lûmü’l-hudûd büyût-ı adîde ve damlar ve samanhâne ve anbâr ve sâir müştemilât-ı ma‘lûmeyi hâvî mülk çiftliğini cemî‘ tevâbi‘ ve levâhıkıyla bundan akdem tarafeynden îcâb ve kabûlü hâvî bey‘-i bâtt-ı sahîh-i şer‘î ile müşârün-ileyh İbrahim Efendi’ye beş yüz on guruşa bey‘ ve temlîk ve çiftlik-i mezbûra tâbi‘ ma‘lûmü’l-hudûd ve’l-kıta‘ arâzisini bâ-ma‘rifet-i sâhib-i arz iki bin beş yüz guruş bedel-i makbûz mukābelesinde ferâğ ve tefvîz ve her birini mahallerinde kabz u tasarrufa tarafından taslît ettikde müşârün-ileyh dahi ber-vech-i muharrer iştirâ ve temellük ve teveffüz ve kabûl eylediğinden sonra semen-i mebî‘-i mezbûrun beş yüz guruşunu yedinden ahz u kabz edip on guruşu müşârün-ileyhin zimmetinde bâkī kalmış idi, mûmâ-ileyh Mahmud Ağa bey‘-i mezkûru ikrâr ve müşârün-ileyhin yedine i‘tâ ve hüccet-i şer‘iyyeye ve semen-i mebî‘-i mezbûrdan bâkī on guruşu müşârün-ileyhden taleb ve da‘vâ ve ahz u kabza ve kendüye îsâl ve teslîme ve bunlar mütevakkıf olduğu umûrun küllîsine küllemâ aziltüke fe-ente vekîlî mefhûmu üzere tarafından beni vekîl ve nâib-i menâb nasb u ta‘yîn ettikde ben dahi ber-vech-i muharrer vekâlet-i mezbûreyi kabûl ve hizmet-i lâzımesini edâya ta‘ahhüd eylediğim ecilden meblağ-ı mezbûr on guruşu müşârün-ileyhden taleb eylediğimde teslîmden imtinâ‘ eder suâl olunup alıverilmesi bi’l-vekâle matlûbumdur dedikde gıbbe’s-suâl müşârün-ileyh İbrahim Efendi cevâbında bâlâda tafsîl ve beyân olunan vech üzere bey‘-i mezkûru ikrâr lâkin müdde‘î-i mezbûrun vekâletini ma‘lûmum değildir deyü inkâr edicek müdde‘î-i mezbûr es-Seyyid Abdulkadir Ağa’dan ber-vech-i mübeyyeni vekâletine beyyine taleb olundukda udûl-ı ahrâr-ı ricâl-i Müslimînden mefâhirü’l-müderrisîni’l-kirâm Ali Efendi b. Mustafa ve hâlâ Yenişehir müftîsi fazîletli el-Hâc Ahmed Efendi b. Salih li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mahmiye-i İstanbul’da Yenibahçe kurbünde sâkin Eminzâde Mahmud Ağa b. el-Hâc Ahmed b. Abdullah yedinde mülk ve hakkı olup vilâyet-i Rumeli’de medîne-i Yenişehir Fener’e tâbi‘ Sarıcalı nâm karyede vâki‘ lede’l-ahâlî ve’l-cîrân ma‘lûmü’l-hudûd ve büyût-ı adîde ve damlar ve samanhâne ve anbâr ve sâir müştemilât-ı ma‘lûmeyi hâvî mülk çiftliğini cemî‘ levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile müşârün-ileyh İbrahim Efendi’ye bizim huzûrumuzda beş yüz on guruşa bey‘ ve temlîk ve çiftlik-i mezbûra tâbi‘ ma‘lûmü’l-hudûd ve’l-kıta‘ arâzisini bâ-ma‘rifet-i sâhib-i arz iki bin beş yüz guruş bedel-i makbûz mukābelesinde ferâğ ve her birini mahallerinde kabz ve tasarrufa tarafından taslît ettikde müşârün-ileyh dahi ber-vech-i muharrer iştirâ ve temellük ve tefevvüz ve kabûl eyledikden sonra semeni olan meblağ-ı mezbûrun beş yüz guruşunu yedinden ahz u kabz edip on guruşu müşârün-ileyhin zimmetinde bâkī kalmış idi, mûmâ-ileyh Mahmud Ağa bey‘-i mezkûru ikrâr ve müşârün-ileyhin yedine i‘tâ ve hüccet-i şer‘iyyeye ve semen-i mebî‘-i mezbûrdan bâkī on guruşu müşârün-ileyhden taleb ve da‘vâ ve ahz u kabz ve kendüye îsâl ve teslîme ve bunlar mütevakkıf olduğu umûrun küllîsine küllemâ aziltüke fe-ente vekîlî mefhûmu üzere tarafından mezbûr es-Seyyid Abdulkadir Ağa’yı vekîl ve nâib-i menâb nasb u ta‘yîn eyledikde ol dahi ber-minvâl-i muharrer vekâlet-i mezbûreyi kabûl ve hizmet-i lâzımesini edâya ta‘ahhüd edip bizi işhâd etmiş idi, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh vekîl-i mezbûr es-Seyyid Abdulkadir Ağa meclis-i şer‘de müşârün-ileyh İbrahim Efendi mahzarında i‘âde-i kelâm edip ânifen edâsına tenbîh olunan meblağ-ı mezbûr on guruşu müşteri-yi müşârün-ileyhin yedinden vekâlet-i mahkiyem hasebiyle tamâmen ahz u kabz eyledim fîmâ-ba‘d çiftlik-i mezkûr alâ-mâ yeştemilühû ve yahvîhi müşârün-ileyh İbrahim Efendi’nin mülk-i müşterâsı ve arâzi-yi mezkûresi hakk-ı müfevvezi ve dâhil-i havza-i tasarrufu olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 22 S sene 1153. Şuhûdü’l-hâl: Umdetü’l-mevâli’l-izâm fazîletli Abdullah Efendi kādı-i medîne-i Âmid sâbıkā, fahrü’l-ulemâ Salih Efendi Müftîzâde, fahrü’l-a‘yân İbrahim Ağa Vakkaszâde, Abdülbaki Çavuş b. İbrahim Ağa, Seyyid Mehmed Çelebi b. Seyyid Mehmed, Seyyid Mehmed Çelebi b. İbrahim, Osman b. Mahmud, Berber İbrahim b. Mustafa, Kasım Çelebi b. Ahmed, Seyyid Abdülgani b. es-Seyyid Nebi, Abdülhalim b. Hasan, Salih Çelebi b. Ahmed