Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 311 Hüküm no: 304 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın evini Mehmed Ağa ve Ayşe Hanım’a sattığı Mübâya‘a Hilâl-i sutûr-ı meymenet-mastûrda münderic husûsu mahallinde ketb ü tahrîri iltimâs olunmağın bu fakīr hâlâ Belgrad defterdârı olan umdetü erbâbi’t-tahrîr ve’l-kalem zübdetü eshâbi’t-tastîr ve’r-rakam sa‘âdetlü Ahmed Efendi hazretlerinin Dârü’s-saltanati’l-aliyye Kostantıniyyetü’l-mahmiye mahallâtından İskender Paşa mahallesinde vâki‘ hânelerine varıp zeyl-i sahîfede mektûbü’l-esâmî Müslimîn huzûrlarında akd-i meclis-i şer‘-i fahrü’l-enâmi olundukda zât-ı iffet-karînleri Müslimîn-i mezkûrîn ta‘rîfleriyle mu‘arrefe olan fahrü’l-muhadderât Âişe Hanım bt. el-merhûm Veliyüddin Efendi meclis-i ma‘kūd-ı mezkûrda sâhib-i hâze’l-kitâb nefs-i nefîslerinden asîl ve halîle-i muhteremeleri umdetü’l-muhadderâti’l-muvakkarât ismetlü Âişe Hanım ibneti’l-müşârün-ileyh Defterdâr Ahmed Efendi taraf-ı izzet-karînlerinden bey‘-i âti’z-zikrde tasdîka vekîl oldukları ber-nehc-i şer‘î sâbit ve sübût-ı vekâletine hükm-i şer‘î lâhık olan fahrü’l-emâsil ve’l-akrân izzetlü Mehmed Ağa b. Osman muvâcehelerinde bi-tav‘iha’s-sâf ikrâr ve i‘tirâf edip zikri câî akdin sudûruna değin silk-i mülk-i sahîhimde münselik olup mahmiye-i merkūmede Sofular mahallesinde vâki‘ bir tarafdan Abdi Çavuş mülkü ve bir tarafdan ba‘zan Yusuf Çelebi mülkü ve ba‘zan merhûm Şa‘bân Efendi Vakfı’ndan bi’l-icâreteyn tasarrufumda olan dükkânlar ve iki tarafdan tarîk-i âm ile mahdûd ve hâriciye ve dâhiliyesinin tabaka-i ulyâ ve vüstâ ve süflâsında büyût-ı adîde ve dîvânhâne ve kilâr ve matbah ve bi’r-i mâ ve hamam ve câmekân ve mâ-i lezîz ve eşcâr-ı müsmire ve gayr-ı müsmireli mukaddemâ bahçe ta‘bîr olunan bostan ve bir mikdâr arsa-i hâliye ve havluyu müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfside ve tağrîr ve gabnden ârî bey‘-i bâtt-ı sahîh-i şer‘î ile mûmâ-ileyhâ Mehmed Ağa ve Âişe Hanım’a ber-vech-i iştirâk-i seviyy sekiz bin sekiz yüz elli guruşa bey‘ ve temlîk ve teslîm eylediğimde mûmâ-ileyhimâ dahi vech-i mübeyyen üzere iştirâ ve temellük ve kabz ve tesellüm ve kabûl eylediklerinden sonra semeni olan meblağ-ı mezbûr sekiz bin sekiz yüz elli guruşu müşteriyân-ı mûmâ-ileyhimânın yedlerinden tamâmen ve kâmilen ahz u kabz eyleyip gabn ve tağrîre müte‘allıka âmme-i de‘âvîden zimmetlerini ibrâ ve ıskāt eyledim ba‘de’l-yevm menzil-i mahdûd-ı mezkûr mûmâ-ileyhimâ Mehmed Ağa ve Âişe Hanım’ın iştirâk-i seviyy üzere mülk-i müşterâları olup kat‘an benim alâka ve medhalim kalmamışdır keyfe mâ yeşâ ve hasbemâ yehtârân mutasarrıf olsunlar dedikde gıbbe’t-tasdîkı’ş-şer‘î mâ hüve’l-vâki‘ bi’l-ibtigā sebt ü terkîm olundu. Fî 23 S sene 1153. Şuhûdü’l-hâl: Ali Efendi b. Mehmed Emin Efendi, el-Hâc Mehmed Efendi b. Musa, Ebubekir Efendi b. Ahmed, Salih Efendi b. Mustafa, Ahmed Ağa b. Mehmed, Abdullah Efendi b. İbrahim, Sahhâflar Şeyhi Ali Efendi, Mehmed Efendi ibni’l-mezbûr Ali Efendi, Ali Efendi kādı-i …? muvakkaten, İsmail Efendi el-imâm bi-Câmi‘-i Mahmud Paşa, Ali Çelebi b. Ali, Hasan Çelebi b. Süleyman, Hasan Çelebi b. Hüseyin