Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 325 Hüküm no: 470 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlarından dolayı kiralık helvacı dükkânını bırakıp firar eden Pîrî Çelebi b. Mehmed’in dükkânı açılıp içindeki eşyanın emanete konduğu Mahmiye-i İstanbul’da Ayasofya Mahallesi’nde sâkin olan umdetü erbâbi’t-tahrîr ve’l-kalem zübdetü ashâbi’t-takrîr ve’r-rakam Avni Efendi mahfil-i kazâya gelip takrîr-i kelâm edip mahmiye-i İstanbul’da Tahtelkal‘a’da vâki‘ Ayasofya-i kebîr Evkāfı’ndan icâre-i mu‘accele ve müeccele ile taht-ı tasarrufumda olan bir bâb helvacı dükkânında müstecirim olan Pîrî Çelebi b. Mehmed nâm kimesne düyûn-ı kesîresi olmağla firâr edip zikrolunan dükkân-ı mezbûrun kilidi elinde kalıp bana ve cânib-i vakfa gadr olmağın işbu yedimde olan buyruldu-yı şerîf mûcebince cânib-i şer‘den üzerine varılıp ol dükkân açılıp mezbûr Pîrî’nin mevcûd olan eşyâsı tahrîr ve bir emîn kimesnede emânet vaz‘ olunup zikrolunan dükkân fârigan bana teslîm olunmak murâdımdır dedikde küttâb-ı mahkemeden mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî olan Müslimîn ile varıp zikrolunan dükkânı açdıklarında içinde mezbûr Pîrî’nin otuz vakıyye fındık içi ve on bir vakıyye bâdem içi ve on bir aded sagīr ve kebîr fıçı ve iki tabla ve iki ağaç sini ve altı aded kutu ve bir piştahta ve bir iskemle ve bir boş yağ küpü ve bir boş tulum ve dokuz aded sagīr ve kebîr mermer taş ve beş aded helvacı küreği ve bir hasır mevcûd bulundu, bu mecmû‘unu mevlânâ-yı mezbûr mahallinde tahrîr ve yine merkūm Avni Efendi yedinde emânet vaz‘ edip ol dükkânı fârigan kendüye teslîm eyledikden sonra gelip vâki‘ hâli meclis-i şer‘de inhâ ve takrîr etmeğin mâ-vaka‘a gıbbe’t-taleb ketb ü sebt olundu. Fi’l-yevmi’s-sânî ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: el-Hâc Nasuh b. el-Hâc Hasan, Hüseyin Çelebi b. el-Hâc Ali, Ahmed Çelebi b. Osman, Abdülbâki Çelebi b. Resül el-müezzin, Mehmed b. Mustafa.