Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 313 Hüküm no: 305 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi’nin evini Fatıma bt. Mustafa’ya sattığı Mübâya‘a Mahmiye-i İstanbul’da Tercümân Yunus mahallesinde sâkin Mehmed Çelebi b. İsmail Efendi nâm kimesne meclis-i şer‘-i hatîr-ı lâzımü’t-tevkīrde zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Fâtıma bt. Mustafa Efendi nâm hatun muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede İbrahim Paşa Hamâmı kurbünde vâki‘ iki tarafdan Halil Odabaşı menzili ve dellâkler odası ve iki tarafdan tarîk-i hâs ve tarîk-i âm ile mahdûd ve ulyâda iki bâb oda ve bir sofa ve dehliz ve vüstâda iki bâb oda ve bir sofa ve dehliz ve bir matbah ve kenîf ve süflâda bir ahur ve havlu ve müşterek bir su kuyusunu müştemil mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Fâtıma Hatun’a altı yüz yetmiş bir guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğimden sonra semeni olan meblağ-ı mezbûr altı yüz yetmiş bir guruşu mezbûre Fâtıma Hatun yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda benim kat‘an alâka ve medhalim kalmayıp mezbûre Fâtıma Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 S sene 1153. Şuhûdü’l-hâl: es-Seyyid Mustafa Çelebi Üsküdarî, Hasan Efendi b. Abdullah, el-Hâc Mustafa Ağa b. Mehmed, Şefik Mehmed Efendi b. el-Hâc Eyüb, el-Hâc Yusuf b. Abdullah, el-Hâc Ahmed b. Yusuf, Molla Ali b. Abdullah, Sinobî Osman