Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 313 Hüküm no: 306 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun olan Abdülbari’nin attâr dükkânındaki yarı hissesini satması için kardeşi Mahmud Ağa’ya izin verildiği Bey‘a izin Mahmiye-i İstanbul’da el-Hâc Hüseyin mahallesi ahâlîsinden cünûn-ı mutbık ile mecnûn olan Abdülbari b. el-Hâc Ahmed b. el-Hâc Mehmed’in li-ebeveyn er karındaşı ve kıbel-i şer‘den tesviye-i emrine bâ-hüccet-i şer‘iyye vasiyy-i mansûbu olan işbu bâ‘isü’l-kitâb Mahmud Ağa nâm kimesne meclis-i şer‘-i hatîr-ı lâzımü’t-tevkīrde bi’l-vesâye takrîr-i kelâm ve ta‘bîr ani’l-merâm edip mahmiye-i merkūmede Samatya kapısı dâhilinde vâki‘ arsasının sene[de] şehremîni olanlara otuzar akçe mukāta‘a-i kadîmesi ve üzerindeki ebniyesi karındaşım mecnûn-ı mezbûr ile ber-vech-i münâsafe yedimizde mülk-i mevrûsumuz olan ma‘lûmü’l-hudûd bir bâb attâr dükkânında olan nısf hissemi âhara bey‘ murâd edip mecnûn-ı mezbûrun nısf hissesini ifrâz mümkün olmayıp ve hâsılı harcına vefâ etmediğinden mâ‘adâ mecnûn-ı mezbûrun mâlı olmayıp nafaka ve kisveye ihtiyâcı olmağın mecnûn-ı mezbûrun nısf hissesini benim hissem ile ma‘an ba‘de’l-müzâyede ve inkıtâ‘i’r-rağbet semen-i misli ile âhara bey‘ ve semen-i mezkûrdan nısf hissesi istirbâh ve istiğlâl olunup nemâsıyla mecnûn-ı mezbûr Abdülbari infâk ve iksâ olunmak her vechile hakkında evlâ ve enfa‘ olmağla işbu hâzırûn bi’l-meclis Müslimînden ba‘de’l-istihbâr kıbel-i şer‘den vech-i muharrer üzere âhara bey‘e bana izin verilmesi bi’l-vesâye murâdımdır dedikde fi’l-hakīka hâl vasiyy-i mezbûrun bâlâda tahrîr olunan takrîri üzere olduğunu zeyl-i kitâbda mastûrü’l-esâmî bî-garaz Müslimîn alâ-tarîkı’ş-şehâde haber vermeleriyle mûcebince mecnûn-ı mezbûr Abdülbari’nin dükkân-ı mezkûrda olan nısf hissesini ber-vech-i meşrûh âhara bey‘e vasiyy-i mezbûr Mahmud Ağa’ya izin birle mâ-vaka‘a bi’t-taleb ketb olundu. Fî 24 S sene 1153. Şuhûdü’l-hâl: Mehmed Çelebi b. Ali, es-Seyyid Mehmed Çelebi b. Nimetullah, Yahya Çelebi b. Mehmed, diğer Mehmed Çelebi b. Abdullah