Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 314 Hüküm no: 307 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İshak Ağa’nın yanına bırakılan Hüseyin’e nafaka takdiri Nafaka Mahmiye-i İstanbul’da Hoca Ali mahallesinde sâkin bâ‘is-i hâze’l-kitâb İshak Ağa b. Mustafa nâm kimesne meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip gāib ani’l-beled Halil b. Abdullah nâm kimesne bundan akdem işbu sulbî sagīr oğlu Hüseyin’i li-ecli’t-terebbî ve’t-tebennî bana def‘ ve teslîm edip lâkin sagīr-i mezbûrun mâlı olmayıp nafaka ve kisveye ihtiyâcı olmağla men-lehü’l-ahz ve’t-taleb üzerine kıbel-i şer‘den kadr-ı ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisvesi’çün men-lehü’l-ahz ve’t-taleb üzerine târîh-i kitâbdan yevmî dört akçe farz ve takdîr buyurup ve meblağ-ı mefrûz-ı mezbûru sagīr-i merkūmun nafaka ve kisvesine harc ü sarfa ve lede’l-iktizâ istidâne ve inde’z-zafer men-lehü’l-ahz ve’t-taleb üzerine rücû‘a merkūm İshak Ağa’ya izin vermeğin mâ-vaka‘a bi’t-taleb ketb olundu. Fî 25 S sene 1153. Şuhûdü’l-hâl: Mehmed b. Abdullah, Du‘âcı Molla Hüseyin, es-Seyyid Mustafa b. es-Seyyid Hasan, el-Hâc Mustafa Arabzâde