Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 315 Hüküm no: 309 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah’ın kızı Emetullah’a nafaka takdiri Nafaka Mahrûse-i Galata muzâfâtından kasaba-i Kasımpaşa’da Surûrî mahallesinde sâkinelerinden olup zâtını ârifân Ebulmevahib Çelebi b. Ahmed ve Hüseyin Çelebi b. Abdullah nâm kimesneler ta‘rîfleriyle mu‘arrefe olan râfi‘atü hâze’l-kitâb Zeyneb bt. Abdullah nâm hatun meclis-i şer‘-i hatîr-ı lâzımü’t-tevkīrde zevc-i mutallıkı Yusuf b. Mehmed nâm kimesne mahzarında takrîr-i kelâm ve ta‘bîr ani’l-merâm edip mezbûr Yusuf’un firâşından hâsıla ve benden mütevellide ve hâlâ bi-hakkı’l-hıdâne hacr ve terbiyemde olan işbu sadriye sagīre kızım Emetullah’ın nafaka ve kisveye eşedd-i ihtiyâcı olmağla nafaka ve kisvesi’çün babası mezbûr Yusuf üzerine taraf-ı şer‘-i enverden kadr-ı ma‘rûf nafaka ve kisve-bahâ farz ve takdîr olunmak murâdımdır dedikde gıbbe’l-istintâk ve’t-tasdîk hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb efendi hazretleri dahi sagīr-i mezbûrenin nafaka ve kisvesi’çün babası mezbûr Yusuf üzerine târîh-i kitâbdan bi’t-terâzi yevmî altışar akçe nafaka ve kisve-bahâ farz ve takdîr edip meblağ-ı mefrûz-ı mezkûr altışar akçeyi sagīr-i mezbûrun nafaka ve kisvesine harc ü sarfa ve lede’l-iktizâ istidâneye ve inde’z-zafer meblağ-ı müstedân ile babası mezbûr Yusuf’a rücû‘a mezbûre Zeyneb Hatun’a izin vermeğin mâ hüve’l-vâki‘ bi’t-taleb ketb ü terkîm olundu. Fî 25 S sene 1153. Eş-şâhidûnü’s-sâbikūn