Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 316 Hüküm no: 310 Orijinal metin no: [45a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un çocukları Mustafa ve Ümmügülsüm’e nafaka takdiri Nafaka Mahmiye-i İstanbul’da Hoca Üveys mahallesi sâkinlerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Hadîce bt. Mustafa nâm hatun meclis-i şer‘-i hatîr-ı lâzımü’t-tevkīrde zevc-i sâbıkı Hâfız Mehmed Efendi b. Mustafa nâm kimesne mahzarında takrîr-i kelâm ve ta‘bîr ani’l-merâm edip mezbûr Hâfız Mehmed Efendi’nin firâşından hâsıllar ve benden mütevellidler olup ve hâlâ bi-hakkı’l-hıdâne hacr ve terbiyemde olan işbu sadrî sagīr oğlum Mustafa ve sadriye sagīre kızım Ümmügülsüm’ün mâlları olmayıp nafaka ve kisveye ihtiyâcı olmağla sagīrân-ı mezbûrânın nafaka ve kisve-bahâları’çün babası mezbûr Mehmed Efendi üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb bi-tevkī‘ihi’ş-şerîfi’l-müstetâb tûbâ-lehû ve hüsnü-meâb efendi hazretleri dahi sagīrân-ı mezbûrânın nafaka ve kisve-bahâları’çün babası mezbûr Mehmed Efendi üzerine rızâlarıyla târîh-i kitâbdan her birine yevmî ikişer paradan cem‘an yevmî dört para farz ve takdîr buyurup meblağ-ı mefrûz-ı mezkûr dört parayı sagīrân-ı mezbûrânın nafaka ve kisvelerine harc ü sarfa ve lede’l-iktizâ istidâneye ve inde’z-zafer babası mezbûr Hâfız Mehmed Efendi üzerine rücû‘a mezbûre Hadîce Hatun’a izin birle mâ-vaka‘a bi’t-taleb ketb olundu. Fî 25 S sene 1153. Şuhûdü’l-hâl: Ali b. Abdullah, Ahmed b. Hüseyin, el-Hâc Mustafa b. el-Hâc Mehmed, Ahmed b. Şa‘bân