Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 316 Hüküm no: 311 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’den muhâlaa ile boşanmış olan Fatıma Hatun’un mehri ile alakalı açtığı davada sulh olduğu Sulh Mahmiye-i İstanbul’da Yenibahçe kurbünde Karabaş mahallesinde sâkine ve zâtı zeyl-i kitâbda isimleri mastûr Müslimîn ta‘rîfleriyle mu‘arrefe olan Fâtıma bt. Mehmed nâm hatun meclis-i şer‘-i hatîr-ı lâzımü’t-tevkīrde zevc-i sâbıkı bâ‘is-i hâze’l-kitâb Ali Beşe b. Mehmed nâm [kimesne] mahzarında tayi‘an ikrâr-ı tâm ve takrîr-i kelâm edip zevcim mezbûr Ali târîh-i kitâbdan beş ay mukaddem mahmiye-i merkūmede Ahî Çelebi Mahkemesi nâibi fazîletli Abdullah Efendi huzûrunda mezbûrun zimmetinde mütekarrer ve ma‘kūdün-aleyh iki bin akçe mehr-i müeccelim ve nafaka-i iddetim üzerlerine ve me’ûnet-i süknâm dahi kendi üzerime olmak üzere mezbûr Ali Beşe ile hul‘ olup hukūk-ı zevciyete müte‘allıka da‘vâdan birbirimizin zimmetini ibrâ ve ıskāt etmiş idik, lâkin hul‘-i mezbûr kerh ile olmağın meblağ-ı mezbûr iki bin akçe mehrimi mezbûr Ali Beşe’den taleb ederim deyü da‘vâ sadedinde olduğumda beynimize muslihûn tavassut edip da‘vâ-yı mezkûremden beni mezbûr Ali Beşe ile beş guruş üzerine sulh eylediklerinde ben dahi ber-vech-i muharrer sulh-ı mezbûru kabûl ve bedel-i sulh-ı merkūm beş guruşu yedinden ahz u kabz eylediğimden sonra husûs-ı mezkûra ve târîh-i kitâba gelince sâir hukūka müte‘allıka âmme-i da‘vâdan mezbûr Ali Beşe’nin zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 S sene 1153. Şuhûdü’l-hâl: Mumcu Mehmed Beşe b. Ahmed, el-Hâc Ahmed b. Ömer, Mustafa Çelebi b. Mehmed, Mehmed Çelebi b. İbrahim