Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 317 Hüküm no: 312 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tavukçu Ali Beşe’nin varislerinden Hatice Hatun’un bir miktar para karşılığında terekedeki haklarından vazgeçtiği İbrâ Mahmiye-i İstanbul’da Müftî Ali Çelebi mahallesi ahâlîsinden olup bundan akdem vefât eden Tavukçu Ali Beşe b. Hasan b. Abdurrahman’ın verâseti zevce-i menkûha-i metrûkesi Emine bt. Mahmud nâm hatun ile sulbiye kebîre kızları Hadîce ve Hamide nâm hatunlara münhasıra ve tashîh-i meselesi on altı sehmden olup sihâm-ı mezkûreden iki sehmi zevce-i mezbûre Emine Hatun’a ve yedişer sehmi mezbûretân Hadîce ve Hamide Hatun’dan her birine isâbeti tahakkukundan sonra mezbûre Hadîce Hatun’un zevci ve tarafından husûs-ı âti’l-beyânı ikrâra vekîl olduğu zât-ı mezbûreyi ârifân mahalle-i mezbûre imâmı Salih Efendi b. Mehmed Efendi ve Mehmed Ağa b. Abdullah şehâdetleriyle sâbit olan el-Hâc Mehmed b. Abdülbasıt nâm kimesne meclis-i şer‘-i hatîr-ı lâzımü’t-tevkīrde tereke-i müteveffâ-yı mezbûra vâzı‘atü’l-yed olan zâtı ta‘rîf-i şer‘î ile mu‘arrefe olan üvey vâlidesi bâ‘isetü hâzihi’l-vesîka mezbûre Emine Hatun mahzarında bi’l-vekâle ikrâr ve takrîr-i kelâm edip arsasının merhûm Ahmed Ağa nâm sâhibü’l-hayrın vakfına beher şehr otuzar akçe mukāta‘-i kadîmesi üzerinde mevcûd ebniyesinin nısfı mûrisimiz müteveffâ-yı mezbûrun ve nısf-ı âharı mezbûre Emine Hatun’un yedlerinde mülk ve hakları olmağla ebniye-i mezkûrenin nısf-ı şâyi‘inde ve müteveffâ-yı mezbûrun ber-mûceb-i defter-i müfredât tereke-i ma‘lûmesinden tashîh-i mezkûr üzere müvekkilem mezbûre Hadîce Hatun hisse-i irsiyesi mukābelesinde şerâit-i sıhhat-i sulhü hâvî mevâni‘-i müfsideden ârî nukūd ve terekeden hisse-i irsiyesinden ezyed alâ-tarîkı’t-tehârüci’ş-şer‘î mezbûre Emine Hatun ile yüz yirmi guruş üzerine sulh olup bedel-i sulh olan meblağ-ı mezbûr yüz yirmi guruşu mezbûre Emine Hatun yedinden tamâmen ahz u kabz edip nısf ebniye-i mezkûreye ve müteveffâ-yı mezbûrun kalîl ü kesîr, celîl ü hakīr âmme-i da‘vâdan mezbûre Emine Hatun ile kız karındaşı gāibetü ani’l-meclis mezbûre Hamide Hatun’un zimmetlerini ibrâ-i âmm-ı râfi‘ü’l-hısâm ile ibrâ ve ıskāt eylediğinde onlar dahi kezâlik tereke-i müteveffâ-yı mezbûra müte‘allıka âmme-i da‘vâdan müvekkilem mezbûre Emine Hatun’un zimmetini ibrâ ve ıskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 S sene 1153. Şuhûdü’l-hâl: Mustafa Efendi b. Mahmud, Osman Efendi b. Mustafa, el-Hâc İsmail b. İbrahim, Mehmed Çelebi b. Abdullah, Salih Efendi imâm-ı mahalle-i mezbûre