Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 318 Hüküm no: 313 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hatun’un oğlundan aldığı nafakayı kendisine ulaştırmak üzere Mustafa Çelebi’yi vekil tayin ettiği İsbât-ı vekâlet Mahmiye-i İstanbul’da Kuyumcu Bahşayiş mahallesi sâkinelerinden olup zâtı ta‘rîf-i şer‘î ile mu‘arrefe olan Ümmügülsüm bt. Yusuf nâm hatun meclis-i şer‘-i şerîf-i enverde işbu bâ‘isü’l-kitâb Mustafa Çelebi b. İbrahim nâm kimesne mahzarında ikrâr ve takrîr-i kelâm edip ben mu‘dime ve mu‘sire olup nafaka ve kisveye eşedd-i ihtiyâcım olmağın mûsir olan oğlum es-Seyyid Mehmed b. es-Seyyid Mahmud üzerine kıbel-i şer‘den yevmî onar akçe nafaka farz ve takdîr olunup yedime işbu hüccet-i şer‘iyye i‘tâ olunmuş idi. Hâlâ maskat-ı re’sim olan vilâyet-i Anadolu’da Kayseriye kazâsına âzim olmamla oğlum mezbûr es-Seyyid Mehmed’den beher şehr nafaka-i mefrûza-i mezkûremi taleb ve da‘vâ ve ahz u kabza ve lede’l-iktizâ sulh ve ibrâya ve bana îsâl ve teslîme ve bunlar tavakkuf eylediği umûrun küllîsine tarafımdan mezbûr Mustafa Çelebi’yi vekîl ve nâib-i menâb nasb u ta‘yîn eylediğimde ol dahi ber-vech-i muharrer vekâlet-i mezkûreyi kabûl ve hizmet-i lâzımesini kemâ yenbağī edâya ta‘ahhüd ve iltizâm eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 26 S sene 1153. Şuhûdü’l-hâl: İbrahim b. Abdullah, Ali Efendi b. İbrahim, Mustafa Çelebi b. Ahmed, Ahmed b. Hasan Sarsan?, Ali b. Abdullah Üsküdarî, Mustafa Solak