Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 318 Hüküm no: 314 Orijinal metin no: [45b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin boşandığı Havva Hatun’un mehrini aldığı İbrâ Mahmiye-i Kostantıniyye’de Kadıçeşmesi kurbünde Yarhisar mahallesinde sâkine Havva bt. Mehmed b. Abdullah nâm hatun oğlu ve tarafından husûs-ı âti’z-zikre vekîl olduğu zât-ı merkūmeyi ma‘rifet-i şer‘iyye ile ârifân Mehmed Çelebi b. Hasan ve Musa Çelebi b. Mehmed nâm kimesneler şehâdetleriyle sâbit ve sübût-ı vekâletine hükm-i şer‘î lâhık olan Süleyman Çelebi b. Ali nâm kimesne meclis-i şer‘-i şerîf-i enverde müvekkile-i mezbûrenin zevc-i sâbıkı râfi‘-i hâze’l-kitâb fahrü’l-kuzâti’l-kirâm Halil Efendi b. Ömer muvâcehesinde bi’l-vekâle ikrâr-ı tâm ve takrîr-i kelâm edip mezbûr Halil Efendi müvekkilem mezbûreyi târîh-i kitâbdan beş ay mukaddem bâyinen tatlîk etmekle zimmetinde mütekarrer ve ma‘kūdün-aleyh dört bin akçe mehrini bana def‘ ü teslîm ettikde ben dahi vekâlet-i mahkiyem hasebiyle yedinden tamâmen ahz u kabz edip hukūk-ı zevciyete ve sâir târîh-i kitâba gelince hukūk-ı ma‘lûme ve mechûleye müte‘allıka âmme-i da‘vâdan bi’l-vekâle mezbûr Halil Efendi’nin zimmetini ibrâ ve ıskāt eylediğimde ol dahi ibrâ-i mezkûru ba‘de’l-kabûl hukūk-ı zevciyete ve sâir târîh-i kitâba gelince hukūk-ı ma‘lûme ve mechûleye müte‘allıka âmme-i da‘vâdan müvekkilem mezbûre Havva’nın zimmetini ibrâ ve ıskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 26 S sene 1153. Şuhûdü’l-hâl: el-Hâc Mustafa Arabzâde, es-Seyyid Mustafa Ruhalı, Hüseyin Çelebi b. el-Hâc Mehmed, Mehmed Ağa b. Mehmed Kethüdâ-yı Muhzırân, Mehmed Çelebi b. Abdullah, Molla Ali b. Salih, Molla Ali b. Mehmed, Molla Süleyman b. Hasan, Ahmed Çelebi b. Şa‘bân, Mehmed Çelebi b. İbrahim