Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 325 Hüküm no: 471 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marine bt. Kürkçü Yani’nin Mora’daki mallarını teslim almak üzere Emrullah Efendi’yi vekil tayin ettiği Mahmiye-i Galata’da Karaköy kapısı dâhilinde sâkine Marine bt. Kürkçü Yani nâm Nasrâniyye mahfil-i kazâda İnebolu sâkinlerinden muvakkaten Narda kādısı olan işbu bâ‘isü’l-kitâb fahrü’l-kuzât Emrullah Efendi [b.] Abdülbâki mahzarında takrîr-i kelâm ve tavzîh-i merâm edip vilâyet-i Mora’da Ayapetre kazâsına tâbi‘ Ayayani nâm karyede vâki‘ babam merkūm Kürkçü Yani ve zevcim Yani v. Yorgi nâm zimmîlerin metrûkâtlarından bi-hasebi’l-irsi’ş-şer‘î bana intikāl eden emlâk ve akārâtımı da‘vâ ve talebe ve ahz u kabza ve zabt ü tasarrufa mûmâ-ileyh Emrullah Efendi’yi tarafımdan vekîl ve menâbıma nâib nasb ve ta‘yîn eyledim, mûmâ-ileyh Emrullah Efendi dahi vekâlet-i mezbûreyi kabûl ve [me]râsimini edâya müte‘ahhid oldu dedikde mûmâ-ileyh Emrullah Efendi dahi vekâlet-i mezbûreyi kabûl ve merâsimini edâyâ müte‘ahhid oldum deyip mezbûre Marine’yi kelimât-ı meşrûhasında vicâhen tasdîk ve tahkīk etmeğin mâ-hüve’l-vâki‘ ketb-i? rakīm ve mûmâ-ileyh Emrullah Efendi’nin yedine vaz‘ ve teslîm olundu. Tahrîren fi’l-yevmi’s-sâbi‘ ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Mustafa Efendi el-kādı bi-Gördos muvakkaten, Ahmed Çelebi tâbi‘-i Mustafa Efendi, Salih Çelebi tâbi‘-i Mustafa Efendi, Hüseyin Çelebi tâbi‘-i Emrullah Efendi, Ahmed Çelebi tâbi‘-i Emrullah Efendi, Yani v. ( ) Ürgüplü, Dimitri v. Dini, Kanilo v. Kostantin, Vasil v. Yani, Mihal v. Kostantin, Mihal v. Nikola.