Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 319 Hüküm no: 315 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa’nın çiftliğini hanımı Zeyneb Hatun’a sattığı Çiftlik mübâya‘ası Mahmiye-i İstanbul’da Baba Hasan Alemî mahallesinde sâkin fahrü’l-eşbâh Ömer Ağa b. Mustafa nâm kimesne meclis-i şer‘-i hatîr-ı lâzımü’t-tevkīrde bâ‘isetü hâzihi’l-vesîka zevcesi Zeyneb bt. Süleyman nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup Havâss-ı aliyye kazâsı muzâfâtından Büyükçekmece nâhiyesine tâbi‘ Kalyoz karyesinde vâki‘ tarafeyni mer‘â ve bir tarafı tarîk-i hâs ve bir tarafı tarîk-i âm ile mahdûd büyût-ı adîde ve anbâr ve fırın ve samanlık ve ahur ve beş dönüm mikdârı zât-ı eşcâr-ı müsmire ve gayr-ı müsmireli bahçeyi müştemil çiftlik ta‘bîr olunur mülk menzilimi ve derûnunda mevcûd on dört saban demiri ve on çeğel ve üç bel ve yedi balta ve dokuz çapa ve iki tırpan ve iki destere ve beş keser ve beş burgu ve bir zincir manda yuları ve dört araba ve iki tencere ma‘a kapak ve dört sahan ve bir bakır sini ve iki leğen ve ıbrık ve bir tâbe ve bir bakrac ve bir demir iskemle ve iki kantar ve dört minder ve altı yasdık ve iki kilim ve dört çift kara sığır öküzü ve bir çift manda öküzü ve iki boğa ve dört kara sığır ineği ve bir tosun ve üç dâbbe ve bir manda ineği ve seksen keyl mezrû‘ hınta ve altmış keyl şa‘îr ve seksen keyl alef ve elli keyl mevcûd-ı anbâr hınta ve dört kiriş saman ve on kaz ve on beş ördek ve kırk tavuk ve sekiz Mısrî tavuk ve bir koyun kışlağı ve üç kıt‘a kürûmu mülk bağımı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile zevcem mezbûre Zeyneb Hatun’a bi-safkatin vâhidetin bin guruşa bey‘ ve temlîk ve teslîm ve semen-i mezkûr bin guruş mutâlebesinden zevcem mezbûre Zeyneb Hatun’un zimmetini ibrâ ve yine karye-i mezbûra tâbi‘ çiftlik-i mezkûra teba‘iyet ile zirâ‘at ve hırâset olunan ma‘lûmü’l-hudûd ve’l-kıta‘ tarla ve çayırı bâ-ma‘rifet-i mütevellî zevcem mezbûreye meccânen ferâğ-ı kat‘î ile ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve kabz ve arâzi-i mezkûresini dahi tefevvüz ve kabûl etmekle min-ba‘d benim emlâk-i mezkûre ve arâzi-i mekūmede kat‘an alâka ve medhalim kalmayıp zevcem mezbûre Zeyneb Hatun’un mülk-i müşterâsı ve hakk-ı müfevvezi olmuşdur keyfe mâ teşâ ve tehtâr mutasarrıfa olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 25 S sene 1153. Şuhûdü’l-hâl: Hüseyin b. Abdullah, Molla Ahmed b. Süleyman, İsmail Çelebi, Berber Mehmed Çelebi, Berber Hasan Ağa, Mustafa Odabaşı, Hüseyin Çelebi b. Süleyman, Süleyman b. Abdullah