Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 320 Hüküm no: 316 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin attâr dükkânını daha önce kardeşine vermiş olduğundan Andelibzade Süleyman’a satmasının mümkün olmadığı Medîne-i Ruscuk ahâlîsinden olup mahmiye-i İstanbul’da Balkapanı Hanı’nda müsâfiren sâkin Ahmed Çelebi b. Abdullah nâm kimesne meclis-i şer‘-i şerîf-i enverde bâ‘isü’l-kitâb Andelibzâde el-Hâc Süleyman b. el-Hâc Mustafa nâm kimesne mahzarında üzerine da‘vâ ve takrîr-i kelâm edip mezbûr el-Hâc Süleyman medîne-i mezbûrede attârlar sûkunda vâki‘ ma‘lûmü’l-hudûd bir kepenk attâr dükkânını bundan akdem iki yüz yirmi beş guruş semen-i medfû‘ ve makbûza bana bey‘ ve temlîk ve mahallinde beni kabzına taslît etmiş idi. Hâlâ dükkân-ı mezkûru zabt ve tasarruf murâd ettiğimde gāib ani’l-meclis karındaşım İsmail Çelebi’ye fâriğ oldum deyip bana teslîme ta‘allül ve imtinâ‘ etmekle suâl olunup dükkân-ı merkūm bana teslîme tenbîh olunmak matlûbumdur deyü ba‘de’d-da‘vâ ve’s-suâl mezbûr el-Hâc Süleyman cevâbında dükkân-ı mezkûru fi’l-hakīka mezbûr Ahmed’e iki yüz yirmi beş guruş semen-i makbûza bey‘ eylediğini ikrâr lâkin dükkân-ı merkūm hâlâ şeyhülislâm sellemehü’l-meliki’l-azîzi’l-allâm hazretlerinin nezâret-i aliyyelerinde âsûde olan ashâb-ı hayrâtdan merhûm Abdülbaki Paşa Evkāfı’ndan olmağla dükkân-ı mezkûru bâ-ma‘rifet-i mütevellî-yi vakf merkūm karındaşım mezbûr İsmail’e bundan akdem ferâğ ve tefvîz edip tasarrufu’çün taraf-ı vakıfdan yedine temessük verilmiş idi deyü def‘ etmekle def‘-i mezkûruna mutâbık bir kıt‘a mu‘anven ve mersûm mütevellî temessükü ibrâz eyleyip temessük-i mezkûra nazar olundukda dükkân-ı mezkûr fî-nefsi’l-emr müşârün-ileyh hazretlerinin taht-ı nezâret-i aliyyelerinde olan evkāfdan olup karındaşı merkūm İsmail’e bâ-ma‘rifet-i mütevellî fâriğ olduğu zâhir olmağın mûcebince mezbûr Ahmed Çelebi dükkân-ı mezkûra bi-gayr-ı vech-i şer‘î müdâhaleden ba‘de’l-men‘ semen olmak üzere makbûzu olan meblağ-ı mezbûr iki yüz yirmi beş guruşu merkūm Ahmed Çelebi’ye def‘ ve teslîme mezbûr el-Hâc Süleyman’a tenbîh birle mâ-vaka‘a bi’t-taleb ketb olundu. Fî 26 S sene 1153. Şuhûdü’l-hâl: Molla Mehmed b. Mustafa, İsmail b. Ahmed, Kürd el-Hâc Mehmed