Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 321 Hüküm no: 318 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi’nin sahibi olduğu eve ait mülkname yandığından kendisine yenisinin verildiği Mahmiye-i İstanbul’da Hoca Teberrük mahallesinde sâkin bâ‘isü’l-kitâb İbrahim Çelebi b. Osman nâm kimesne meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip mahalle-i mezbûrede vâki‘ bir tarafdan ba‘zan es-Seyyid Mustafa Çelebi menzili ve ba‘zan Fesci el-Hâc Abdullah menzili ve bir tarafdan Medîne-i münevvere Vakfı’ndan tasarrufumda olan arsa ve bir tarafdan Emiroğlu Mehmed Beşe menzili ve bir tarafdan tarîk-i âm ile mahdûd büyût-ı adîdeyi muhtevî olan arsasının mahalle-i mezbûre müezzini olanlara senede üç yüz akçe mukāta‘a ile ebniyesi mülk menzil mukaddemâ vefât eden babam merkūm Osman hayâtında müddet-i medîde zabt ve tasarruf edip ba‘dehû fevt oldukda hasren vârisi olduğuma binâen bana mevrûs olup ben dahi otuz seneden mütecâvizdir ki zabt ve tasarruf üzere iken bundan akdem vâki‘ olan harîk sebebiyle menzil-i mezbûrun mülknâmeleri zâyi‘ olmağla hakīkat-i hâl işbu hâzırûn bi’l-meclis Müslimînden ba‘de’l-istihbâr haberleri tahrîr ve kıbel-i şer‘-i enverden yedime vesîka i‘tâ olunmak murâdımdır dedikde vâki‘ hâl mahalle-i mezbûre ahâlîlerinden olmalarıyla husûs-ı mezbûra vukūf-ı tâmları olup zeyl-i vesîkada muharrerü’l-esâmî Müslimînden istihbâr olundukda fi’l-hakīka mezbûr İbrahim Çelebi’nin takrîr-i meşrûhu üzere olduğunu her biri ihbâr etmeleriyle mûcebince menzil-i mezbûru ke’l-evvel tasarrufu’çün kıbel-i şer‘-i enverden vesîka ketb ü imlâ ve mezbûr İbrahim Çelebi yedine def‘ u i‘tâ olundu, cerâ zâlik. Ve hurrire fi’l-yevmi’s-sâbi‘ ve’l-ışrîn min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: Ebubekir Efendi b. Mehmed, es-Seyyid Mustafa Çelebi b. es-Seyyid Mehmed, Mehmed Çelebi b. Ahmed, Halil Çelebi b. Abdullah