Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 322 Hüküm no: 319 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin evini Mehmed Çelebi’ye sattığı Mübâya‘a Mahmiye-i İstanbul’da Kâtib Hüsrev mahallesinde sâkin Ahmed Efendi b. Mehmed b. Mustafa nâm kimesne tarafından bey‘-i âti’z-zikri ikrâra vekîl olduğu Abdullah Çelebi b. el-Hâc Bektaş ve Hasan Çelebi b. Mustafa nâm kimesneler şehâdetleriyle sâbit olan karındaşı Abdullah Çelebi b. el-merkūm Mehmed nâm kimesne meclis-i şer‘-i hatîr-ı lâzımü’t-tevkīrde bâ‘isü’l-kitâb Mehmed Çelebi b. Hüdaverdi nâm kimesne mahzarında bi’l-vekâle ikrâr-ı tâm ve takrîr-i kelâm edip arsasının merhûm el-Hâc Kasım b. Abdülmennan nâm sâhibü’l-hayr vakfına senede yüz seksen akçe mukāta‘a-i kadîmesi olup ve ebniyesi akd-i âti’z-zikrin sudûruna değin müvekkil-i mezbûrun yedinde mülk ve hakkı olan mahalle-i mezbûrede vâki‘ bir tarafdan ba‘zan el-Hâc Ali ve ba‘zan Mehmed Çavuş menzilleri ve bir tarafdan el-Hâc Mehmed menzili ve bir tarafdan Mumcu Mehmed Çelebi nâm müteveffânın veresesi tasarrufunda olan menzil ve bir tarafdan tarîk-i âm ile mahdûd ulyâda bir bâb oda ve bir sofa ve vüstâda bir bâb oda ve bir sofa ve kilâr ve süflâda bir bâb oda ve bir kenîf ve bir su kuyusu ve bir mikdâr havlu ve etrâf-ı erba‘ası taş duvarı müştemil menzilin ber-vech-i muharrer ebniye-i memlûkesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Çelebi’ye altı yüz guruşa bey‘ ve temlîk ve teslîm ve arsa-i mezkûresini dahi bâ-ma‘rifet-i mütevellî-yi vakf-ı mezbûr meccânen ferâğ ve tefvîz eylediğinde ol dahi minvâl-i muharrer üzere iştirâ ve temellük ve tesellüm ve tefevvüz ve kabz ve kabûl eylediğinden sonra semeni olan meblağ-ı mezbûr altı yüz guruşu mezbûr Mehmed Çelebi yedinden bi’l-vekâle tamâmen ahz u kabz eyledim ba‘de’l-yevm menzil-i mahdûd-ı mezkûrda müvekkil-i mezbûr Ahmed Efendi’nin alâka ve medhali kalmayıp mezbûr Mehmed Çelebi’nin ebniye-i mezkûresi mülk-i müşterâsı ve arsası dâhil-i havza-i tasarrufu olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 S sene 1153. Şuhûdü’l-hâl: Attâr Ali Çelebi b. Mustafa Çelebi b. İsmail, Attâr el-Hâc Ebubekir, Mehmed Çelebi b. Hasan, Hasan Ağa b. Mustafa, İbrahim Ağa b. Yusuf, el-Hâc Ömer Ağa b. Mesud, Parmakkapı İmâmı Mustafa Efendi, el-Hâc Abdi Ağa b. el-Hâc Yusuf, Ahmed Efendi b. Üveys, Ali Çavuş Ağa b. el-Hâc Süleyman, İbrahim Odabaşı Ağa b. Mehmed