Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 323 Hüküm no: 321 Orijinal metin no: [46b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Abdullah’ın bırakıp gittiği Emine Hatun’a nafaka takdiri İzin Mahmiye-i İstanbul’da Karabaş mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Emine bt. İbrahim nâm hatun meclis-i şer‘-i şerîf-i enverde takrîr-i kelâm edip zevcim olup gāib ani’l-beled es-Seyyid Abdullah b. es-Seyyid Mehmed bundan akdem beni bilâ-nafaka ve lâ-münfik-i şer‘î terk edip diyâr-ı âhara gitmekle nafaka ve me’ûnetim için kıbel-i şer‘den zevcim gāib-i mezbûr üzerine kadr-ı ma‘rûf akçe farz ve takdîr olunmak matlûbumdur dedikde hâl minvâl-i muharrer üzere olduğu zeyl-i kitâbda muharrerü’l-esâmî sikāt-ı Müslimîn ihbârlarıyla müte‘ayyen olup mezbûre Emine tahlîf-i şer‘î ile tahlîf olundukdan sonra hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi mezbûre Emine Hatun’un nafaka ve sâir me’ûnetleri için zevci gāib-i mezbûr [47a] üzerine târîh-i kitâbdan yevmî beş akçe farz ve takdîr edip meblağ-ı mefrûz-ı mezkûru kendi nafaka ve levâzım-ı zarûriyesine harc ü sarfa ve lede’l-iktizâ istidâneye ve inde’z-zafer zevci gāib-i mezbûr üzerine rücû‘a mezbûre Emine’ye izin vermeğin mâ-vaka‘a bi’t-taleb ketb olundu. Fî 27 S sene 1153. Şuhûdü’l-hâl: el-Hâc Mustafa b. el-Hâc Mehmed, es-Seyyid Mustafa b. es-Seyyid Hasan, el-Hâc Mehmed, Hasan Çelebi