Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 324 Hüküm no: 322 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haşimzade Mustafa’nın Ahmed Efendi’ye olan borcuna kefil olan Abdülfettah Efendi’nin bu parayı ödediği Ahz u kabz Husûs-ı âti’l-beyânın mahallinde istimâ‘ ve tahrîri için bi’l-iltimâs cânib-i şer‘-i enverden irsâl olunan Mevlânâ Ömer Efendi b. Nurullah Efendi mahmiye-i İstanbul’da Ebulfeth Sultan Mehmed Hân Câmi‘-i şerîfi civârında Haraçcı Muhyiddin mahallesinde vâki‘ Abdülfettah Efendi b. Abdülvahab Efendi’nin menzili hâriciyesine varıp zeyl-i vesîkada muharrerü’l-esâmî Müslimîn huzûrlarında akd-i meclisi- şer‘-i şerîf eyledikde mahmiye-i mezbûrede Beyceğiz mahallesinde sâkin fahrü’l-kuzât râfi‘-i hâze’l-kitâb Ahmed Efendi b. el-Hâc Abdullah meclis-i ma‘kūd-ı mezkûrda mezbûr Abdülfettah Efendi mahzarında üzerine da‘vâ ve takrîr-i kelâm edip mezbûr Abdülfettah Efendi vilâyet-i Rumeli’de medîne-i Manastır ahâlîsinden olup diyâr-ı Bosna’da Foça kādısı iken bundan akdem vefât eden Haşimzâde Mustafa Efendi b. Hüseyin Efendi b. Kemâleddin Efendi’ye hâl-i hayâtında ve târîh-i kitâbdan otuz bir ay ve yirmi üç gün mukaddem işbu mümzâ ve mahtûm yedime verdiği temessükü mantûkunca kendi mâlımdan ikrâz ve teslîm ol dahi yedimden iktirâz ve tesellüm ve ahz u kabz eylediği yüz elli guruş ile yine mezbûr Mustafa Efendi’nin hayâtında târîh-i mezbûrda kendi mâlımdan ve yedimden iştirâ ve kabz eylediği bir re’s kır at semeninden olan altmış guruş hakkım ki min-haysü’l-mecmû‘ mezbûr Mustafa Efendi’nin zimmetinde bana olan iki yüz on guruş deynine tarafeynden emr ü kabûlü hâvî kefâlet-i sahîha ile kefîl olmağla ben meblağ-ı mezbûru kable’l-ahz ve’l-istîfâ asîl-i mezbûr Mustafa Efendi fevt olup meblağ-ı mezbûr zimmetinde kalmağın hâlâ kefâlet-i mezkûresine binâen meblağ-ı mezbûru mezbûr Abdülfettah Efendi’den taleb eylediğimde edâ ve teslîmden imtinâ‘ eder suâl olunup meblağ-ı mezbûru ber-mûceb-i kefâlet-i mezkûre bana edâ ve teslîme tenbîh olunması murâdımdır dedikde gıbbe’s-suâl ve bi’l-külliye akībe’l-inkâr müdde‘î-i mezbûr Ahmed Efendi’den müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden zikr olan Beyceğiz mahallesinde sâkin Süleyman Çelebi b. Şa‘bân ve yine mahmiye-i mezbûrede Hırka-i şerîfe mahallesinde sâkin İbrahim Efendi b. Ahmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka vilâyet-i Rumeli’de medîne-i Manastır ahâlîsinden olup diyâr-ı Bosna’da Foça kādısı iken bundan akdem vefât eden Haşimzâde Mustafa Efendi b. Hüseyin Efendi b. Kemâleddin Efendi hâl-i hayâtında ve kemâl-i akl-ı sıhhatinde târîh-i kitâbdan otuz bir ay ve yirmi üç gün mukaddem bizim huzûrumuzda işbu müdde‘î-i mezbûr Ahmed Efendi’ye yedine verdiği mümzâ ve mahtûm işbu temessükü mantûkunca cihet-i karzdan yüz elli guruş ile yine mezbûr Ahmed Efendi yedinden iştirâ ve kabz eylediği bir re’s kır at semeninden dahi altmış guruş ki min-haysü’l-mecmû‘ zimmetinde mezbûr Ahmed Efendi’ye iki yüz on guruş vâcibü’l-edâ deyni olduğunu ikrâr ve bizleri işhâd edip ve işbu Abdülfettah Efendi dahi mezbûr Mustafa Efendi zimmetinde olan iki yüz on guruşa tarafeynden emr ü kabûlü hâvî kefâlet-i sahîha ile kefîl oldu, bizler bu husûsa bu vech üzere şâhidleriz şehâdet dahi ederiz deyü her biri şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın müdde‘î-i mezbûr Ahmed Efendi ba‘de’t-tahlîfi’ş-şer‘î mûcebiyle ba‘de’l-hükm ve’t-tenbîh müdde‘î-i mezbûr Ahmed Efendi meclis-i ma‘kūd-ı mezkûrda mezbûr Abdülfettah Efendi huzûrunda i‘âde-i kelâm edip ânifen edâ ve teslîmine tenbîh olunan meblağ-ı mezbûr iki yüz on guruşu ber-mûceb-i kefâlet-i mezkûre mezbûr Abdülfettah Efendi yedinden tamâmen ahz u kabz eyledim fîmâ-ba‘d meblağ-ı mezbûrdan asîl ve kefîl zimmetlerinde bir akçe ve bir habbe hakkım kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin ve’l-ışrîn min-Saferi’l-hayr li-sene selâse ve hamsîn ve mi’e ve elf. Şuhûdü’l-hâl: es-Seyyid Mustafa Çelebi b. es-Seyyid Hasan, ve Ahmed b. Hüseyin, Paşo Abdi b. Said Ağa, fahrü’l-kuzât Ahmed Efendi b. Mehmed Efendi, Mustafa Çelebi b. Ahmed, Mustafa Efendi b. İbrahim, Müezzin Mahmud Çelebi b. Mustafa, Musli b. Hüseyin, Ömer Ağa b. Mehmed, es-Seyyid Abdullah Çelebi b. Mehmed, Ali b. Mehmed