Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 325 Hüküm no: 323 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Köle olduğu gerekçesiyle Hüseyin b. Mehmed’in elinde bulunan Hanife’nin köle olmadığını ispatladığı İsbât-ı hürriyet Sâbıkā rıkkıyetini mu‘terife ve ber-vech-i âtî kıbel-i şer‘den me’zûne olan orta boylu, açık kaşlı, elâ gözlü, bâ‘isetü hâzihi’l-vesîka an-asl Hanife nâm-ı diğer Fâtıma meclis-i şer‘-i şerîf-i enverde kendüye rakīka olmak üzere vaz‘-ı yed eden el-Hâc Hüseyin b. Mehmed nâm kimesne mahzarında üzerine da‘vâ ve takrîr-i kelâm edip ben vilâyet-i Kırım’da Bahçesaray kurbünde Çelebiler nâm karye ahâlîsinden Abdurrahman b. Abdullah’ın firâşından hâsıla ve zevce-i menkûhası Âişe bt. Ömer nâm hatundan mütevellide olup bana ve ebeveynime kat‘an rık târî olmamış hürretü’l-asl iken mezbûr el-Hâc Hüseyin bana rakīka olmak zu‘muyla bi-gayr-ı hakkın vaz‘-ı yed eder suâl olunup sebîlim tahliye ve mezbûrun kasr-ı yedine tenbîh olunmak matlûbumdur dedikde gıbbe’s-suâl mezbûr el-Hâc Hüseyin cevâbında şerîkimiz olup medîne-i Kefe’de sâkin Menteşoğlu el-Hâc Mehmed Ağa târîh-i kitâbdan on beş ay mukaddem Kerş kasabası sâkinlerinden Gözüotlu Mehmed nâm reisden Rusiyetü’l-asl olmak üzere mâl-ı şirketden Kırım akçesiyle sekiz yüz guruş semen-i medfû‘ ve makbûza [47b] ba‘de’l-iştirâ âhara bey‘ etmek için bana irsâl etmekle mülk-i müşterâmız olmak üzere vaz‘-ı yed ederiz deyü vaz‘-ı yedini ikrâr mâ‘adâyı inkâr edicek mevsûfe-i mezbûreden ber-vech-i muharrer müdde‘âsına mutâbık beyyine taleb olundukda ahrâr-ı ricâl-i Müslimînden ve mârrü’z-zikr Çelebiler karyesi ahâlîsinden olup mahmiye-i İstanbul’da müsâfiren sâkinler Yahya b. Abdüllatif ve el-Hâc Ali b. İsmail nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu orta boylu, açık kaşlı, gök elâ gözlü an-asl Hanife nâm-ı diğer Fâtıma vilâyet-i Kırım’da Bahçesaray kurbünde Çelebiler karyesi ahâlîsinden Abdurrahman b. Abdullah’ın firâşından hâsıla ve zevce-i menkûhası Âişe bt. Ömer nâm hatundan mütevellide olup mevsûfe-i mezbûre Hanife’ye ebeveynine kat‘an rık târî olmamış hürretü’l-asıldır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle mevsûfe-i mezbûrenin hürriyetine ba‘de’l-hükm mezbûr el-Hâc Hüseyin’in kasr-ı yedine tenbîh birle mâ-vaka‘a bi’t-taleb ketb olundu. Fî 27 S sene 1153. Şuhûdü’l-hâl: Kul Mehmed b. İbrahim? tâbi‘-i Süleyman Paşa, el-Hâc Lütfullah b. el-Hâc Fettah, el-Hâc Hüseyin b. Mehmed, el-Hâc İbrahim b. Ebubekir, Hocazâde el-Hâc İsmail Ağa, İsmail Beşe b. Abdullah