Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 326 Hüküm no: 472 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bizeban Lala Bey’in vârislerinin miras kalan evlerini sattıkları Husûs-ı âti’r-rakīm mahallinde ketb ü terkīm olunması için mahkeme-i şerîfe kâtiblerinden bi’l-iltimâs irsâl olunan fahrü’l-kuzât mevlânâ Abdulkādir Efendi mahmiye-i İstanbul’da Sultan Selim Câmi‘-i şerîfi kurbünde merhûm Koğacı Dede Mahallesi’nde sâkin bi’l-fi‘il mîrî sebzehâne kâtibi olan işbu kitâb-ı sedâd-intisâbın sâhibi umdetü erbâbi’t-tahrîr ve’l-kalem Beyzâde Mahmud Efendi b. el-merhûm Hüseyin’in sâkin oldukları menziline varıp zeyl-i kitâbda mastûrü’l-esâmî olan Müslimîn huzûrlarında akdeylediği meclis-i şer‘-i şerîfde mahmiye-i mezbûrede Molla Aşkī Mahallesi’nde sâkin iken bundan akdem vefât eden Bîzebân Lala Bey b. Ali’nin verâseti zevce-i metrûkesi Emine bt. Hüseyin <> ve sulbiye kebîre kızı Âişe bt. ( ) nâm bikr-i bâligaya ve on dört yaşında olup sin ve cüssesinin tahammülü olmağla bülûğuna ma‘rifet olan sulbî kebîr oğlu Mehmed Çelebi’ye münhasıra olup menzil-i âti’z-zikrin yirmi dört sehmden üç sehmi mezbûre Emine’ye ve yedi sehmi mezbûre Âişe’ye ve on dört sehmi mezbûr Mehmed Çelebi’ye isâbet eylediği şer‘an mütehakkık ve müte‘ayyen oldukdan sonra merkūmetân Âişe ve Emine ve merkūm Mehmed Çelebi meclis-i mezbûrda müşârun-ileyh Mahmud Efendi mahzarında herbiri asâleten ikrâr-ı tâm ve takrîr-i kelâm edip yine mahmiye-i mezkûrede Kenîse Câmi‘-i şerîfi Mahallesi’nde vâki‘ bir tarafdan ba‘zan Osman Efendi ve ba‘zan Çâker Ağa mülkleri ve bir tarafı ba‘zan el-Hâc Mehmed ve ba‘zan Usta Yusuf mülkleri ve bir tarafı tarîk-i hâs ve bir tarafı tarîk-i âm ile mahdûd birbirine mülâsık iki bâb tahtânî odaları ve mukābelesinde dahi kezâlik birbirine mülâsık iki bâb tahtânî odaları ve bunların yanında zât-ı eşcâr-ı müsmire cüneyneyi ve bi’r-i mâyı ve yine hudûd-ı mezbûr dâhilinde birbirine muttasıl iki bâb tahtânî odaları ve kezâlik birbirine muttasıl sekiz bâb fevkānî odaları ve bunların altında bir samanlık iki ahırı ve harâbe müşrif bir kubbeli hamamı ve bir yoğurtçu kârhânesi ve önünde iki su kuyularını ve hadîkayı ve el-Hâc Mehmed tarafından taş duvarı ve beş perde sokak kapılarını müştemil mûrisimiz müteveffâ-i mezbûrdan vech-i muharrer üzere bize intikāl edip mülk-i mevrûsumuz olan menzilden zikrolunan hisse-i şer‘iyye-i şâyi‘alarımızı müşârun-ileyh Mahmud Efendi’ye bin iki yüz elli sekiz kıt‘a esedî guruşa cânibeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin herbirimiz bey‘ ve teslîm edip mûmâ-ileyh Mahmud Efendi dahi menzil-i mezbûru minv[â]l muharrer üzere iştirâ ve tesellüm eyledikden sonra semeni olan meblağ-ı mezbûr bin iki yüz elli sekiz esedî guruşdan bâlâda zikrolunan üç sehm mukābelesinde isâbet eden yüz elli yedi esedî guruşu mezbûre Emine ve yedi sehm mukābelesinde isâbet eden üç yüz altmış yedi esedî guruşu mezbûre Âişe ve on dört sehm mukābelesinde isâbet eden yedi yüz otuz dört esedî guruşu mezbûr Mehmed Çelebi herbiri bi’t-tamam ve’l-kemâl ahz u kabz eyledik, semen-i mezbûrdan min-ba‘d bir akçe ve bir habbe hakkımız ve menzil-i mezbûrda alâka ve medhalimiz kalmayıp mûmâ-ileyh Mahmud Efendi’nin mülk-i müşterâları olmuşdu, keyfe mâ yeşâ’ [ve] yehtâr mutasarrıf olsunlar dediklerinde mukırrûn-ı mezbûrûndan herbirin ikrâr-ı meşrûhlarında mûmâ-ileyh Mahmud Efendi vicâhen tasdîk ve şifâhen tahkīk ettikden sonra hâzırân bi’l-meclis olan Ahmed Çelebi b. Muslı ve mezbûre Emine’nin zevci Hüseyin Bey b. Abdullah nâm yesârî menzil-i mezbûrun derkine emr [ve] kabûlü hâviye kefâlet-i sahîha-i şer‘iyye ile herbiri kefîller olmağın vâki‘ hâli mevlânâ-yı mezbûr mahallinde tahrîr ba‘dehû gelip meclis-i şer‘de vukū‘u üzere inhâ ve takrîr etmeğin mâ-hüve’l-vâki‘ gıbbe’t-taleb ketb olundu. Hurrire fi’l-yevmi’s-sâlis ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Umdetü’l-vâ‘izîn eş-Şeyh İvaz Efendi, Yusuf Efendi b. Mahmud el-imâm bi-mahalle-i Derviş Ali, Mustafa Efendi b. Ahmed, İbrahim Efendi b. Ahmed, Hasan Çelebi b. Ahmed, Mehmed Çelebi b. Osman, Mustafa Çelebi b. Mehmed, Zülfikār Ağa b. Hasan el-hamamî, Muzaffer Bey b. Abdullah, el-Hâc Hasan b. Abdullah, Sami b. Ali, Ali Çelebi b. eş-Şeyh Zülfikār, Ömer Bey b. Abdullah, Ahmed Efendi b. Mehmed ve gayruhum mine’l-huzzâr.