Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 327 Hüküm no: 325 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın vefatıyla küçük oğlu Abdullah’a kalan ev, anbar ve tarlaların satılmasına izin verildiği Nafaka-i zarûre izin Vilâyet-i Anadolu’da Gerede kasabası mahallâtından Şeyhler mahallesinde sâkin iken bundan akdem vefât eden Süleyman b. el-Hâc Mehmed Kemâleddin b. Abdurrahman’ın sulbî sagīr oğlu Abdullah’ın vâlidesi ve cânib-i şer‘-i kavîmden mansûb vasiyesi olup zâtı ta‘rîf-i şer‘î ile mu‘arrefe olan Meryem bt. el-Hâc Ali nâm hatun meclis-i şer‘-i şerîf-i enverde bi’l-vesâye takrîr-i kelâm ve bast-ı merâm edip mârrü’z-zikr Şeyhler mahallesinde vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât menzil ve anbâr ma‘lûmü’l-hudûd dört kıt‘a tarlalar müteveffâ-yı mezbûr Süleyman’ın ile’l-vefât yedinde mülkü ve taht-ı tasarrufunda hakk-ı müfevvezi olup ba‘de vefâtihi sagīr-i mezbûra intikāl edip lâkin hâsılı harcına vefâ etmediğinden mâ‘adâ sagīr-i mezbûrun nafaka ve kisveye eşedd-i ihtiyâcı olmağla zikri sebk eden menzil ve anbâr semen-i misilleriyle ve tarlalar dahi bedel-i misilleri ve ma‘rifet-i sâhib-i arz ile âhara bey‘ [ve] ferâğ ve semen ve bedelleri istirbâh ve istiğlâl olunup hâsıl olan fazla ve nemâsıyla sagīr-i mezbûr infâk ve iksâ olunmak her vechile hakkında evlâ ve enfa‘ olmağın kıbel-i şer‘den ber-vech-i muharrer bana izin verilmek bi’l-vesâye matlûbumdur dedikde vasiye-i mezbûre Meryem’in bâlâda tafsîl ü beyân olunan takrîri vâkı‘a mutâbıka idiği zeyl-i vesîkada isimleri mastûr Müslimîn haberleriyle şer‘an zâhir ve müstahık oldukdan sonra mûcebince menzil ve anbâr ve tarlaları âhara bey‘ ve ferâğa vasiye-i mezbûre Meryem Hatun’a izin birle mâ-vaka‘a bi’t-taleb ketb olundu. Fî 28 S sene 1153. Şuhûdü’l-hâl: Molla Mehmed b. Davud, Ali b. Mehmed, Ebubekir b. İsmail, Mehmed Çelebi b. Ahmed