Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 328 Hüküm no: 326 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agiya ve Kabril’in aldıkları borçlarını ödemeleriyle ilgili kendilerine mühlet verildiği Mahmiye-i İstanbul’da Pirinçci Sinan mahallesinde mütemekkin işbu râfi‘ü’s-sifr Serkiz v. Bağdasar nâm zimmî meclis-i şer‘-i hatîr-ı lâzımü’t-tevkīrde mahmiye-i mezbûrede Tevkī‘î Cafer mahallesinde mütemekkinân Agiya ve Kabril v. Abram nâ[m] zimmîler muvâcehelerinde zimmiyân-ı mesfûrânın babaları mesfûr Abram v. Agokel hâzır olduğu halde ikrâr ve takrîr-i kelâm edip târîh-i kitâbdan on bir sene ve beş ay mukaddem mesfûrân Agiya ve Kabril zimmîler arsası Şirin Hatun Vakfı’na yevmî bir akçe icâre-i müecceleli ve binâsı akd-i âti’z-zikrin sudûruna değin ber-vech-i iştirâk-i seviyy yedlerinde mülk ve hakları olup mezbûrede vâki‘ bir tarafdan Solak Çelebi mülkü ve bir tarafdan Nagıle nâm Nasrâniye mülkü ve bir tarafdan Terzibaşı ve bir tarafdan tarîk-i âm ile mahdûd ma‘lûmü’l-müştemilât menzilinin arsasını bâ-ma‘rifet-i mütevellî-yi vakf-ı mezbûr kat‘an bana ferâğ ve binâsını [48a] dahi cümle tevâbi‘iyle üç seneye değin bey‘-i bi’l-vefâ tarîkıyle yedimden makbûz iki yüz elli guruş semen mukābelesinde bana bey‘ ve teslîm ben dahi ber-vech-i muharrer iştirâ ve tesellüm ve kabz ve kabûl etmiş idim, ancak mebî‘-i mezbûr hakīkatde yedimde rehin ve semen meblağ-ı mezbûr iki yüz elli guruş mesfûrân Agiya ve Kabril’in zimmetlerinde bana deynleri olmağla bundan akdem zimmiyân-ı mesfûrânı deyn-i mezkûru bana edâ ve menzil-i mezkûru rehniyetden fekk ü tahlîs edin deyü mutâlebe edip ol vechile beynimizde münâza‘ât-ı kesîre vâkı‘a olmuş idi, el-hâletü hâzihi beynimizde muslihûn tavassutuyla zimmiyân-ı mesfûrân Agiya ve Kabril deyn-i mezkûru târîh-i kitâbdan üç ay tamâmına değin bana edâ etmek üzere istimhâl edip ve eğer müddet-i mezbûre tamâmında edâ edemez isek bey‘-i mezkûrumuz bey‘-i kat‘î olsun deyü ikrâr ve i‘tirâf eylediklerinde ben dahi ber-vech-i muharrer tecîl ve imhâl ve müddet-i mezkûrede meblağ-ı mezbûr edâ olunmaz ise bey‘-i merkūmu minvâl-i muharrer üzere kabûl eyledim dedikde gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fî 29 S sene 1153. Şuhûdü’l-hâl: Ömer Efendi el-kâtib, Mehmed Beşe b. Ahmed, es-Seyyid Mustafa Çelebi Urfavî, Derviş Hüseyin b. Musa, Mustafa Çelebi b. Abdullah