Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 330 Hüküm no: 328 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın vefatıyla kızları Havva ve Hatice’ye kalan harap evin satılmasına izin verildiği İzin Mahmiye-i İstanbul’da Cerrâhpaşa kurbünde Şemseddin Ahmed Bey mahallesi ahâlîsinden olup bundan akdem vefât eden Ali b. Abdullah nâm kimesnenin sulbiye sagīre kızları Havva ve Hadîce’nin vâlideleri ve tesviye-i umûrlarına vasiye-i mansûbeleri olup zâtı İbrahim Çelebi b. Mehmed ve el-Hâc İbrahim b. Abdullah nâm kimesneler ta‘rîfleriyle mu‘arrefe olan sâhibet-i hâzihi’l-vesîka Râziye bt. Mehmed nâm hatun meclis-i şer‘-i şerîf-i enverde takrîr-i kelâm ve bast-ı merâm edip sagīretân-ı mezbûretâna babaları müteveffâ-yı mezbûrdan müntakil mahalle-i mezbûrede vâki‘ ma‘lûmü’l-hudûd ve’l-müştemilât bir bâb vakıf menzil müşrif-i harâb ve mâil-i türâb olduğundan mâ‘adâ sagīretân-ı mezbûretân nafaka ve kisveye eşedd-i ihtiyâcla muhtâceler olmağla menzil-i mezbûr bedel-i misliyle âhara ferâğ ve bedeli kabz ve istirbâh ve sagīretân-ı mezbûretânın levâzım-ı zarûriyesine harc ü sarf olunmak evlâ ve enfa‘ olmağla ber-vech-i muharrer ferâğa kıbel-i şer‘den bana izin verilmek matlûbumdur dedikde mezbûre Râziye’nin takrîr-i meşrûhu vâkı‘a mutâbık ve nefsü’l-emre muvâfık olduğu vukūf-ı tâmmı olan sikāt-ı sahîhati’l-kelimâtdan bî-garaz Müslimîn ihbârlarıyla mütehakkık olmağın menzil-i mezbûru ber-vech-i muharrer ferâğa mezbûre Râziye’ye kıbel-i şerî‘at-i garrâdan izin verilip mâ-vaka‘a bi’t-taleb ketb olundu. Fî 23 S sene 1153. Şuhûdü’l-hâl: Salih Çelebi b. Süleyman, el-Hâc Süleyman b. el-Hâc Mehmed, Mehmed Çelebi b. Ahmed, Abdullah Çelebi b. Ahmed