Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 330 Hüküm no: 329 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın evini Ali Ağa’ya sattığı Mübâya‘a Mahmiye-i İstanbul’da Cibali kapısı dâhilinde Üskübî mahallesinde sâkin el-Hâc Osman Ağa b. Halil meclis-i şer‘-i hatîr-ı lâzımü’t-tevkīrde işbu râfi‘ü’l-kitâb Ali Ağa b. Abdullah b. Abdurrahman tarafından ikrâr-ı âti’z-zikri tasdîka vekîl olduğu Ömer Efendi b. Mustafa ve el-Hâc İsmail b. Ebubekir nâm kimesneler şehâdetleriyle sâbit olan Ahmed Ağa b. Hüseyin nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahmiye-i mezbûrede Şeyh Ebulvefâ mahallesinde vâki‘ bir tarafdan Molla Ebubekir mülkü ve bir tarafdan Sitti Hatun Vakfı ve bir tarafdan Halîfe Çeşmesi suyunun mahzeni ve bir tarafdan tarîk-i âm ile mahdûd tûlen ve arzen bi-hesâb-ı terbî‘î elli altı zirâ‘ mülk menzil arsasını bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i mezbûr Ali Ağa’ya iki yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eyledikden sonra semeni olan meblağ-ı mezbûr iki yüz guruşu müşteri-yi müvekkil-i mezbûr Ali Ağa yedinden tamâmen ahz u kabz eyledim fîmâ-ba‘d arsa-i mahdûde-i mezkûre müvekkil-i müşteri-yi mezbûr Ali Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Rebî‘ülevvel sene 1153. Şuhûdü’l-hâl: Mehmed b. Süleyman, İvaz Çelebi b. Abdullah, Mehmed Çelebi b. Ali, Ömer Efendi b. Mustafa, Mustafa Efendi b. Mehmed el-kayyım, el-Hâc Ali Ağa b. Süleyman, Mehmed Ağa b. Mustafa el-hammâmî, el-Hâc İsmail b. Ebubekir, Ahmed Çelebi b. Mehmed