Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 336 Hüküm no: 333 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cezerizade Mehmed Said Efendi’nin çiftliğini Abdullah Efendi’ye sattığı Mübâya‘a Sâbıkā revnak-efzâ-yı sadr-ı Rum olan a‘lemü’l-ulemâi’l-mütebahhirîn efdalü’l-fudalâi’l-müteverri‘în miftâhu künûzi’l-hakāyık messâhu rumûzi’d-dekāyık menba‘ü’l-ulûm ve’l-irfân mecma‘ü’l-ma‘ârif ve’l-beyân mazharu eltâfü’l-meliki’l-mennân sâhib-i hâze’l-kitâbi’l-müstetâb sa‘âdetli inâyetli âtıfetli Mehmed Said Efendi necli’l-merhûm el-mebrûr ed-dâricü ilâ-medârici rahmeti Rabbihi’l-gafûr Şeyhülislâm İsmail Efendi hazretleri zikri âtî husûsu mahallinde ketb ü tahrîrin iltimâs buyurmalarıyla cânib-i şer‘-i enverden ba‘s olunan Mevlânâ Mehmed Efendi b. el-merhûm İbrahim Efendi mahmiye-i İstanbul’da Tevkī‘î Cafer mahallesinde vâki‘ umdetü’l-müderrisîni’l-kirâm zübdetü’l-mehâdîmü’l-fihâm fazîletlü Kebîrîzâde Mustafa Efendi b. el-mevlâ el-merhûm Abdurrahman Efendi hazretlerinin sa‘âdethânelerine varıp zeyl-i kitâbda muharrerü’l-esâmî Müslimîn huzûrunda akd-i meclis-i şer‘-i âlî ettikde fahrü’l-müderrisîni’l-kirâm fazîletlü Cezerîzâde Mehmed Said Efendi b. el-mevlâ el-merhûm Mehmed Said Efendi meclis-i ma‘kūd-ı mezbûrda müşârün-ileyh hazretlerinin kethüdâları ve taraf-ı bâhirü’ş-şereflerinden ikrâr-ı âti’z-zikri tasdîka vekîlleri olduğu ber-nehc-i şer‘î sâbit olan fahrü’l-kuzâti’l-kirâm el-Hâc Abdullah Efendi b. Hüseyin Efendi mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup Havâss-ı refî‘a kazâsı nevâhîsinden Küçük Çekmece nâhiyesine tâbi‘ Ali Bey karyesinde vâki‘ bir tarafı sâhil-i bahr ve iki tarafı arâzi-i çiftlik ve bir tarafı tarîk-i âm ile mahdûd dâhiliye ve hâriciyede büyût-ı adîde ve hamam ve kanavât-ı müsennât ile muhrez mâ-i lezîz ve eşcâr-ı müsmire ve gayr-ı müsmireli bağ ve bahçeyi müştemil çiftlik ta‘bîr olunur mülk menzili bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müvekkil-i müşârün-ileyh hazretlerine bin iki yüz elli guruşa bey‘ ve temlîk ve teslîm ve merhûm ve mağfûrun-leh Sultan Bayezid Hân-ı Veli Vakfı arâzisinden olup karye-i mezbûre sınırı dâhilinde çiftlik-i mezkûra intimâ ile tahdîd ve tavsîfden müstağnî tasarrufumda olan lede’l-ahâlî ve’l-cîrân ma‘lûmü’l-hudûd ve’l-kıta‘ tarlalarımın hakk-ı tasarrufunu dahi bâ-ma‘rifet-i mütevellî-yi vakf-ı mezbûr müşârün-ileyh hazretlerine meccânen ferâğ ve tefvîz eylediğimde müvekkil-i müşârün-ileyh hazretleri dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl buyurduklarından sonra semeni olan meblağ-ı mezbûr bin iki yüz elli guruşu vekîl-i mûmâ-ileyh el-Hâc Abdullah Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezkûrda ve zikr olunan tarlalarda kat‘an alâka ve medhalim kalmayıp müvekkil-i müşârün-ileyh hazretlerinin mülk-i müşterâları ve tarlalar dahi hakk-ı müfevvezi ve dâhil-i havza-i tasarrufu olmuşdur keyfe mâ yeşâ ve yehtâr tasarruf buyursunlar dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fî-gurreti Rebî‘ülevvel sene 1153. Şuhûdü’l-hâl: Hüseyin Çelebi b. Ramazan, fahrü’l-müderrisîni’l-kirâm zübdetü’l-mehâdîmü’l-fihâm fazîletlü Mustafa Efendi b. el-mevlâ el-merhûm Abdurrahman Efendi, fahrü’s-sâdât es-Seyyid Mustafa Efendi b. es-Seyyid Abdülaziz, fahrü’l-kuzât Hasan Efendi b. Derviş Mehmed Efendi, fahrü’l-kuzât Ahmed Efendi b. Hüseyin Çelebi, Ömer Çelebi b. Eyüb