Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 337 Hüküm no: 334 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Musli’nin evini Hasan Odabaşı’ya sattığı Mübâya‘a Mahmiye-i İstanbul’da Oruc Gāzî mahallesinde sâkine Fâtıma bt. el-Hâc Musli b. Abdurrahman nâm hatunun sadrî kebîr oğlu ve tarafından bey‘-i âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân el-Hâc Süleyman b. Hasan ve es-Seyyid Hüseyin Çelebi b. es-Seyyid Ali nâm kimesneler şehâdetleriyle sâbit olan Yahya Çelebi b. el-Hâc Abdullah nâm kimesne meclic-i şer‘-i hatîr-ı lâzımü’t-tevkīrde bâ‘isü’l-vesîka Hasan Odabaşı b. İbrahim nâm kimesne mahzarında bi’l-vekâle ikrâr-ı tâm ve takrîr-i kelâm edip arsasının merhûm Abdülfettahzâde Abdülbaki Efendi Vakfı’na beher mâh altışar akçe icâre-i kadîmesi üzerinde olan ebniyesi müvekkile-i mezbûrenin yedinde mülk ve hakkı olup mahmiye-i İstanbul’da Kirmasti mahallesinde vâki‘ bir tarafdan Hallâc Ahmed Çelebi menzili ve bir tarafdan Ali Çelebi menzili ve bir tarafdan Hüseyin Çelebi menzili ve bir tarafdan tarîk-i âm ile mahdûd fevkānî üç bâb oda ve bir sofa ve tahtânî bir matbah ve bir su kuyusu ve bahçe ve havluyu müştemil menzilinin ebniye-i memlûkesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkile-i mezbûre merkūm Hasan Odabaşı’ya iki yüz guruşa bey‘ ve temlîk ve teslîm ve arsasını dahi bâ-ma‘rifet-i mütevellî meccânen ferâğ ve tefvîz edip mezbûr Hasan Odabaşı dahi ber-vech-i muharrer iştirâ ve temellük ve tesellüm ve tefevvüz ve kabz ve kabûl eylediğinden sonra semeni olan meblağ-ı mezbûr iki yüz guruşu mezbûr Hasan Odabaşı yedinden tamâmen ahz u kabz eyledi ba‘de’l-yevm zikr olunan menzil-i mahdûdda müvekkile-i mezbûre anam Fâtıma Hatun’un kat‘an alâka ve medhali kalmayıp mezbûr Hasan Odabaşı’nın ebniyesi mülk-i müşterâsı ve arsası dâhil-i havza-i tasarrufu olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis min-şehri Rebî‘ülevvel sene 1153. Şuhûdü’l-hâl: Attâr el-Hâc Mehmed, Kavukçu Mehmed Çelebi, Süleyman Çelebi b. Abdullah, Hüseyin Çelebi b. Abdullah, el-Hâc Ahmed Ağa b. Fethullah, Ahmed Çelebi b. Mahmud, Mustafa Çelebi b. Ahmed, el-Hâc Mehmed b. el-Hâc Ali, Ahmed Çelebi b. Abdullah