Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 327 Hüküm no: 473 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. Derviş Ali ile Ali Bey b. Mustafa’nın muhalaa ile boşandıkları Mahmiye-i İstanbul’da Hacı Hamza Mahallesi’nde sâkine Neslihan bt. Derviş Ali nâm hatun tarafından husûs-ı âti’l-beyânı ikrâra vekîli olup vekâleti hasm-ı câhid-i şer‘î mahzarında mezbûrenin zâtını ma‘rifet-i şer‘iyye ile ârifân olan Muharrem Beşe b. Şerif ve İbrahim Beşe b. Hasan şehâdetleri ile şer‘an sâbite olan Ali Efendi b. Mustafa mahfil-i kazâda mezbûre Neslihan’ın zevci işbu bâ‘isü’l-kitâb Ali Bey b. Mustafa mahzarında bi’l-vekâle ikrâr ve takrîr-i kelâm edip müvekkilim mezbûre ma‘kūdün-aleyh olup zevci merhûm Ali Bey zimmetinde mütekarrer olan on bin akçe icâre-i müeccelesi ve nafaka ve iddet ve meûnet-i süknâsı ile beş bin yüz akçe üzerine zevci mezbûr Ali Bey ile muhâla‘a-i sahîha-i şer‘iyye ile hul‘ edip hukūk-ı zevciyete ve meblağ-ı mezbûra müte‘allık cemî‘ da‘vâdan birbirinin zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledikde birbiri ile min-ba‘d da‘vâları kalmadı dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâmin ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Salih b. Abdullah, el-Hâc Şa‘ban b. Ahmed, Halil b. Mustafa, Hüseyin b. Osman ve gayruhum mine’l-huzzâr.