Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 338 Hüküm no: 335 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey’in sahibi olduğu evin mülknamesi yangında yandığından yenisinin verildiği Mahmiye-i İstanbul’da Kefeli mahallesinde sâkin bâ‘isü’l-vesîka Ali Bey b. el-Hâc Mehmed nâm kimesne meclis-i şer‘-i hatîr-ı lâzımü’t-tevkīrde takrîr-i kelâm ve ta‘bîr ani’l-merâm edip mahmiye-i mezkûrede Müftî Hamamı kurbünde Kâtib Hüsrev mahallesinde vâki‘ ma‘lûmü’l-hudûd ve’l-müştemilât mülk menzil mukaddemâ babam mezbûr el-Hâc Mehmed b. Mehmed hayâtında müddet-i müdîd zabt u tasarruf edip ba‘dehû fevt oldukda hasren vârisi olduğuma binâen bana mevrûs ve yirmi seneden berü zabt u tasarruf üzere iken bundan akdem vâki‘ olan harîk sebebiyle menzil-i mezkûrun mülknâmeleri muhterik olmağla hakīkat-i hâl işbu hâzırûn bi’l-meclis Müslimînden ba‘de’l-istihbâr haberleri tahrîr ve kıbel-i şer‘den yedime vesîka i‘tâ olunmak murâdımdır dedikde vâki‘ hâl mahalle-i mezbûre ahâlîlerinden olup husûs-ı mezbûra vukūf-ı tâmları olan zeyl-i vesîkada muharrerü’l-esâmî Müslimîn istihbâr olundukda fi’l-hakīka kaziyye mezbûr Ali Bey’in takrîr-i meşrûhu üzere olduğunu her biri ihbâr eylediklerinde menzil-i mezbûru kemâ-fi’l-evvel mülkiyet üzere zabt ve tasarrufü’çün kıbel-i şer‘den vesîka ketb ü imlâ ve mezbûr Ali Bey’in yedine def‘ u i‘tâ olundu, cerâ zâlik. Ve hurrira fi’l-yevmi’s-sâmin min-şehri Rebî‘ülevvel sene 1153. Şuhûdü’l-hâl: Mustafa Çelebi b. Osman, Ahmed Çelebi b. Mustafa, İbrahim Bey b. el-Hâc Ali, Süleyman Çelebi b. Ahmed, Abdülbaki Çelebi b. Ramazan, Ali Çelebi b. Mehmed, Mustafa Çelebi b. Ali, Ali Çelebi b. Abdullah