Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 338 Hüküm no: 336 Orijinal metin no: [50a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Perdahçı Norses hasta ve yaşlı olduğundan yerine Abdullah Ağa’nın vekil tayin edildiği <> Dârü’s-saltanati’l-aliyye Kostantıniyyetü’l-mahmiyede Mahmud Paşa-i Veli Câmi‘-i şerîfi kurbünde sandal kârhânesinde vâki‘ demir mengene ile kutnî ve peştemâl? ve keremsûd ve emti‘a-i sâireyi perdah eden Norses v. Toros nâm zimmî meclis-i şer‘-i hatîr-ı lâzımü’t-tevkīrde hâlâ sandalcılar kethüdâsı olan hâmil-i hâzihi’l-vesîka zahrü’l-eşbâh Abdullah Ağa b. el-Hâc Mustafa mahzarında ikrâr-ı tâm ve takrîr-i kelâm edip hâlâ ben alîl ve ihtiyâr olmağla mesbûku’z-zikr emti‘aları perdahlamağa bir vechile iktidârım olmayıp zikr olunan emti‘aların mengeneleri mu‘attal kalmamak için yerime bir vekîl nasbı lâbüd ve lâzım olmağın sadâkat ve istikāmet ile mevsûf ve ma‘rûf ve her vechile emti‘a-i mezkûreyi perdah etmeye iktidârı olup cümlenin ihtiyâr eyledikleri mezbûr Abdullah Ağa kıbel-i şer‘den vekîl nasb u ta‘yîn olunup yedine li-ecli’s-sened vesîka verilmek matlûbumdur dedikde fi’l-vâki‘ kaziyye zimmî-yi mesfûrun bâlâda eylediği takrîri üzere olduğunu zeyl-i vesîkada isimleri mastûr sikāt-ı sahîhatü’l-kelimât Müslimîn alâ-tarîkı’ş-şehâde ihbâr etmeleriyle mûcebince mesfûr Norses zimmînin yerine mezbûr Abdullah Ağa kıbel-i şer‘den vekîl nasb u ta‘yîn olundukda ol dahi ber-vech-i muharrer vekâlet-i merkūmeyi kabûl ve merâsimini ikāmete ta‘ahhüd ve iltizâm etmeğin işbu vesîka-i enîka bi’t-taleb ketb ü terkîm olunup mezbûr Abdullah Ağa yedine li-ecli’s-sened def‘ u i‘tâ olundu, cerâ zâlik. Fî 2 Ra sene 1153. Şuhûdü’l-hâl: Ahmed b. el-Hâc Halil, İbrahim Çelebi b. Halil, Mustafa Çelebi b. İbrahim, el-Hâc Mehmed b. İbrahim, fahrü’l-akrân Ali Ağa kethüdâ-yı bedestân, es-Seyyid el-Hâc Hicâzî Yiğitbaşı b. es-Seyyid Ahmed, es-Seyyid Adem Çelebi b. es-Seyyid Zeyneddin, el-Hâc Mehmed b. Abdulkadir, el-Hâc Hüseyin b. Abdurrahman, Ömer b. Abdullah, Mehmed Çelebi b. Abdullah, Vasil v. Mosi, Yani v. Kosta, Kirkor v. Bedros, Kigork v. Yanko, Asvador v. Delot, Corci v. Hana, Alez v. Hana, Artin v. Mazar, Haçador v. Kirkor