Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 339 Hüküm no: 337 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Efendi’nin varislerinin Dede Mustafa Efendi’den haklarını aldıkları, diğer hakları için de Mustafa Çelebi’yi vekil tayin ettikleri Mahmiye-i İstanbul’da Debbâğzâde el-Hâc Hasan mahallesinde sâkine olup kendiden asâleten ve li-eb kız karındaşı Fâtıma bt. İbrahim b. Abdullah nâm hatun tarafından zikri câî da‘vâya vekîl olduğu ber-nehc-i şer‘î sâbit ve sübût-ı vekâletine hükm-i şer‘î lâhık olan bâ‘isetü hâze’l-kitâb Ümmühani nâm hatun vekâleten meclis-i şer‘-i şerîf-i enverde fahrü’l-kuzâti’l-kirâm Lagarîzâde Dede Mustafa Efendi b. el-mevlâ el-merhûm Ahmed Efendi mahzarında bi’l-asâle ve bi’l-vekâle üzerine da‘vâ ve takrîr-i kelâm edip vilâyet-i Kırım’da Yenikale hâricinde Vâlide Câmi‘-i şerîfi imâmı iken bundan akdem vefât eden Osman Efendi benim ve müvekkilem mezbûre Fâtıma ile li-eb karındaşlar olup babamız ismi mezbûr İbrahim ve dedemiz ismi mezbûr Abdullah ve maskat-ı re’simiz mahrûse-i Edirne mahallâtından Hayâlî Çelebi mahallesidir, müteveffâ-yı mezbûrun verâseti zevcesi Hoca Hamide bt. Abdullah nâm hatun ile sulbiye kızı diğer Fâtıma Hatun’a ve usûbet-i nesebiye cihetinden bize münhasıra olup bizlerden gayrı vârisi ve terekesine müstahıkk-ı âhar olmamağla müteveffâ-yı mezbûrun merkūm Dede Mustafa Efendi zimmetinde cihet-i karzdan olan iki bin dört yüz akçeden bana ve müvekkilem mezbûrenin hisse-i irsiyesine isâbet eden dokuz yüz akçeyi merkūm Dede Mustafa Efendi’den taleb eylediğimde edâdan imtinâ‘ eder suâl olunup bana edâya tenbîh olunmak bi’l-asâle ve bi’l-vekâle murâdımdır dedikde gıbbe’s-suâl merkūm Dede Mustafa Efendi cevâbında müteveffâ-yı mezbûra cihet-i mezkûreden zimmetinde iki bin dört yüz akçe deyni olduğunu ikrâr ve mâ‘adâyı inkâr edicek müdde‘iye-i mezbûre Ümmühani Hatun’dan ber-vech-i muharrer müdde‘âsına beyyine taleb olundukda udûl-ı ahrâr-ı ricâl-i Müslimînden ve mahalle-i mezbûre ahâlîsinden es-Seyyid Ömer b. Ali ve es-Seyyid el-Hâc Halil b. Ali nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iye-i mezbûre Ümmühani Hatun ve müvekkilesi li-eb kız karındaşı Fâtıma bt. İbrahim b. Abdullah nâm hatun ile vilâyet-i Kırım’da Yenikale hâricinde Vâlide Câmi‘-i şerîfi imâmı iken bundan akdem vefât eden Osman Efendi ile li-eb karındaşlar olup babaları ismi mezbûr İbrahim ve dedeleri ismi mezbûr Abdullah ve maskat-ı re’sleri mahrûse-i Edirne mahallâtında Hayâlî Çelebi mahallesidir, müteveffâ-yı mezbûrun verâseti zevcesi Hoca Hamide bt. Abdullah nâm hatun ile sulbiye kızı diğer Fâtıma Hatun’a ve usûbet-i nesebiye cihetinden müdde‘iye-i mezbûre Ümmühani Hatun’a ve müvekkile-i mezbûre Fâtıma Hatun’a münhasıra olup bunlardan gayrı vârisi ve terekesine müstahıkk-ı âhar olduğu ma‘lûm ve mesmû‘umuz değildir, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mezbûre Ümmühani Hatun meclis-i şer‘de merkūm Dede Mustafa Efendi mahzarında asâleten ve vekâleten i‘âde-i kelâm edip ânifen edâsına tenbîh olunan dokuz yüz akçe hisse-i irsiyemizi bana edâ ve teslîm ben dahi bi’l-asâle ve bi’l-vekâle yedinden tamâmen ahz u kabz eyledim dedikde gıbbe’t-tasdîkı’ş-şer‘î mezbûre Ümmühani meclis-i şer‘-i enverde hâmil-i hâze’l-kitâb diğer Mustafa Çelebi b. Mehmed muvâcehesinde bi’l-asâle ve bi’l-vekâle ikrâr ve i‘tirâf edip mevrûsumuz müteveffâ-yı mezbûr İmam Osman Efendi’nin nukūd ve terekesinden ve zimem-i nâsda olan hukūkundan hisse-i irsiyemizi vâzı‘u’l-yed olanlardan ve ashâbından taleb ve da‘vâ ve ahz u kabza ve lede’l-iktizâ sulh ve ibrâya ve bize îsâl ve teslîme ve bunlar tavakkuf eylediği umûrun küllîsine asâleten ve vekâleten tarafımdan mezbûr diğer Mustafa Çelebi’yi vekîl ve nâib-i menâb nasb u ta‘yîn eyledim dedikde ol dahi ber-vech-i muharrer vekâlet-i merkūmeyi kabûl ve hıdemât-ı lâzımesini mahallinde edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 2 Ra sene 1153. Şuhûdü’l-hâl: Osman b. Mehmed, Ahmed b. Durmuş, Mehmed Çelebi b. Ahmed, Ahmed b. Yusuf, Ahmed b. Mehmed