Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 341 Hüküm no: 338 Orijinal metin no: [50b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un eşi Abdi Beşe’nin İznikmid’de vefat ettiği ve nafaka talebinde bulunamayacağı Fi’l-asl medîne-i İznikmid sâkinelerinden olup mahmiye-i İstanbul’da Mirâhur mahallesinde sâkine zâtı ta‘rîf-i şer‘î ile mu‘arrefe olan Hadîce bt. Ebubekir nâm hatun meclis-i şer‘-i şerîf-i enverde bâ‘isü’l-kitâb İbrahim b. Abdullah nâm kimesne mahzarında üzerine da‘vâ ve takrîr-i kelâm edip hâlâ medîne-i İznikmid’de sâkin zevcim Abdi Beşe b. Mehmed b. Abdullah târîh-i kitâbdan on dört ay mukaddem medîne-i mezbûra gider oldukda beher şehr ikişer buçuk guruş nafakamı mezbûr İbrahim’den havâle-i sahîha ile havâle eylediğinde ol dahi havâle-i mezbûreyi ba‘de’l-kabûl mezbûr İbrahim meblağ-ı mezbûrun on iki aylık olmak üzere otuz guruşunu bi-tarîkı’l-havâle bana tamâmen edâ ve teslîm ben dahi yedinden ahz u kabz eylediğimden sonra iki ayda müctemi‘ olan beş guruş zimmetinde bâkī kalmağla meblağ-ı bâkī-yi mezbûr beş guruşu mezbûr İbrahim’den taleb ederim suâl olunsun dedikde gıbbe’s-suâl merkūm İbrahim cevâbında fi’l-vâki‘ kazıyye vech-i meşrûh üzere olduğunu ikrâr lâkin müdde‘iye-i mezbûre Hadîce’nin zevci mezbûr Abdi Beşe târîh-i kitâbdan on dört ay mukaddem medîne-i mezbûrede vefât etmekle nafaka-i mezkûre mutâlebesinden zimmetim berî olmuşdur deyü def‘le mukābele edicek gıbbe’l-istintâk ve’l-inkâr mezbûr İbrahim’den def‘-i mezkûruna mutâbık beyyine taleb olundukda udûl-ı ahrâr-ı ricâl-i Müslimînden ve medîne-i mezbûre ahâlîsinden olup mahmiye-i merkūmede müsâfiren sâkinler Hasan b. Ali ve Ali Beşe b. Mehmed nâm kimesne[ler] li-ecli’ş-şehâde meclis-i şer‘a hâzırân olup istişhâd olunduklarında fi[‘l-hakīka] işbu müdde‘iye-i mezbûre Hadîce Hatun’un zevci Abdi Beşe b. Mehmed b. Abdullah târîh-i kitâbdan on dört ay mukaddem medîne-i İznikmid’de vefât etmeğin bizler cenâzesine hâzır olup defn eyledik, biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde mûcebince ba‘de’l-hükm mezbûre Hadîce Hatun nafaka-i bâkıye mutâlebesinden bî-vech mu‘ârazadan men‘ birle mâ-vaka‘a bi’t-taleb ketb olundu. Fî 2 Ra sene 1153. Şuhûdü’l-hâl: es-Seyyid Mustafa Çelebi b. es-Seyyid Hasan, el-Hâc Ahmed b. Ömer, Du‘âcı Molla Hüseyin b. Hacı Mehmed