Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 341 Hüküm no: 339 Orijinal metin no: [50b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hancı Aslan’a emaneten bırakılan eşyaların teslimi Mahmiye-i İstanbul’da Langa kurbünde Kâtibkasım mahallesi ahâlîsinden Uğurlu v. Marat nâm zimmî tarafından husûs-ı âti’z-zikri ahz u kabza vekîl olduğu İbrahim b. Mehmed nâm kimesne ile Yorgi v. Tanaş nâm zimmî şehâdetleriyle sâbit ve sübût-ı vekâletine hükm-i şer‘î lâhık olan anası Kazlarnik bt. Marat nâm Nasrâniye meclis-i şer‘-i hatîr-ı lâzımü’t-tevkīrde mahmiye-i mezkûrede Tahtelkale kurbünde Küçük Sulu Han demekle ma‘rûf hanın hancısı bâ‘is-i hâzihi’r-rakīm Aslan v. (°) nâm zimmî muvâcehesinde bi’l-vekâle ikrâr-ı tâm ve takrîr-i kelâm edip oğlum müvekkil-i mesfûrun eşyâ-i memlûkesinden olup bundan akdem mesfûr Aslan zimmîye ber-mûceb-i i‘lâm bi-tarîkı’l-emâne teslîm olunan iki köhne yasdık ve iki köhne seccâde ve bir Yanbolu sandık ve bir sagīr sepet sandık ve bir kantar ve üç kahve ıbrığı ve bir kutu ve yirmi yedi aded [51a] demir tüfenk harbesi ve bir fincan kutusu ve altı fincan ve bir tahta sandığı mesfûr Aslan zimmî bana def‘ ü teslîm eyledikde ben dahi ber-vech-i muharrer yedinden bi’l-vekâle ahz u kabz eylediğimden sonra oğlu müvekkil-i mersûmun eşyâ-i muharrere-i mezkûreden mesfûr Hancı Aslan yedinde bir habbe bâkī kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Ra sene 1153. Şuhûdü’l-hâl: es-Seyyid Ali Çelebi b. Mustafa, Mehmed b. İbrahim, el-Hâc Mustafa b. el-Hâc Mehmed, Ali b. Abdullah