Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 342 Hüküm no: 340 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Ömer’in oğlu Mustafa’ya nafaka takdiri Mahmiye-i İstanbul’da Kumkapı kurbünde Nişancı Paşa mahallesi sâkinelerinden olup zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka Rukiye bt. Ömer nâm hatun meclis-i şer‘i hatîr-ı lâzımü’t-tevkīrde zevc-i sâbıkı İsmail b. Hüseyin nâm kimesne mahzarında takrîr-i kelâm ve ta‘bîr ani’l-merâm edip mezbûr İsmail’in firâşından hâsıl ve benden mütevellid hâlâ bi-hakkı’l-hıdâne hacr ve terbiyemde olan işbu sadrî sagīr oğlum Mustafa’nın mâlı olmayıp nafaka ve kisveye ihtiyâcı olmağla sagīr-i mezbûrun nafaka ve kisve-bahâsı’çün babası mezbûr İsmail üzerine kıbel-i şer‘den kadr-ı kifâye nafaka ve kisve-bahâ farz ve takdîr olunmak matlûbumdur dedikde gıbbe’t-tasdîkı’ş-şer‘î hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûrun nafaka ve kisve-bahâ ve sâir levâzım-ı zarûriyesi’çün babası mezbûr İsmail üzerine târîh-i kitâbdan bi’t-terâzi yevmî ikişer para farz ve takdîr buyurup meblağ-ı mefrûz-ı mezbûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr İsmail üzerine rücû‘a mezbûre Rukiye Hatun’a izin birle mâ-vaka‘a bi’t-taleb ketb olundu. Fî 4 Ra sene 1153. Şuhûdü’l-hâl: İmâm Mehmed Efendi b. el-Hâc Osman, Müezzin es-Seyyid Mustafa Halîfe b. es-Seyyid Musa, es-Seyyid Mustafa b. es-Seyyid Hasan, el-Hâc Mehmed