Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 343 Hüküm no: 341 Orijinal metin no: [51a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Efendi’nin Yeniçeri Nukud Vakfı’ndan istiğlâl yoluyla borç aldığı Bey‘ bi-tarîkı’l-istiğlâl Mahmiye-i İstanbul’da Hoca Hayreddin mahallesi ahâlîsinden olup Emir Buhârî hazretleri zâviyesi şeyhi olan fahrü’l-meşâyihi’l-kirâm es-Seyyid Şeyh Abdurrahman Efendi b. es-Seyyid Abdülkerim Efendi meclis-i şer‘-i hatîr-ı lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerilerinin onuncu bölüğe mahsûs odanın nukūd-ı mevkūfesine bi’l-fi‘il mütevellî olan bâ‘is-i hâze’l-kitâb Mehmed Ağa b. Mustafa nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ iki tarafdan Kuddisîzâde kerîmesi menzili ve bir tarafdan ba‘zan zikri mesbûk Emir Buhârî Câmi‘-i şerîfi ve ba‘zan tarîk-i hâs ve bir tarafdan tarîk-i âm ile mahdûd ma‘lûmü’l-müştemilât mülk menzilimi mütevellî-yi merkūm Mehmed Ağa’ya bi-tarîkı’l-istiğlâl üç yüz seksen guruşa bey‘ ve teslîm eylediğimde ol dahi ber-vech-i muharrer iştirâ ve tesellüm ve kabûl eylediğinden sonra semeni olan meblağ-ı mezbûr üç yüz seksen guruşu nukūd-ı mevkūfe-i mezbûrdan olmak üzere mütevellî-yi merkūm Mehmed Ağa yedinden tamâmen ahz u kabz eylediğimden sonra menzil-i mahdûd-ı mezkûru gıbbe’t-tahliyeti’ş-şer‘iyye ve’t-tekābuzü’l-mer‘î mütevellî-yi merkūm Mehmed Ağa târîh-i kitâbdan bir sene tamâmına değin elli yedi guruşa bana îcâr ve teslîm ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî S sene 1153. Şuhûdü’l-hâl: es-Seyyid Mehmed Çelebi, el-mezbûr Süleyman Efendi, Mehmed b. Abdurrahman, Süleyman Efendi b. Cedde Mehmed imâm-ı Şehzâde, el-Hâc Mustafa Efendi b. el-Hâc Mehmed, Ali Efendi b. Hüseyin, Mücellid Ali Çelebi b. Abdullah