Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 328 Hüküm no: 474 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Çelebi’nin alacağı için Ahmed b. Mehmed’i vekil tayin ettiği Vilâyet-i Anadolu’da Sapanca kazâsında Adadivanı’nda sâkin Ali Çelebi b. Osman nâm râcil tarafından meblağ-ı âti’l-beyânı kabza vekâlet iddi‘â eden Ahmed b. Mehmed mahfil-i kazâda Mehmed b. Ahmed mahzarında üzerine da‘vâ edip müvekkil-i mezbûrun merkūm Mehmed zimmetinde cihet-i şer‘iyyeden dokuz bin akçe hakkı vardır suâl olunup meblağ-ı mezbûr vekâletim hasebiyle bana alıverilmek matlûbumdur dedikde gıbbe’s-suâl mezbûr Mehmed cevabında fi’l-vâki‘ zimmetinde merkūm Ali Çelebi’nin meblağ-ı mezbûr dokuz bin akçe hakkı olduğunu ikrâr ve müdde‘î-i mezbûr meblağ-ı merkūmu kabza vekîli olduğunu inkâr edicek müdde‘î-i mezbûrdan vekâletini müsbite beyyine taleb olundukda udûl-i ricâlden el-Hâc Mehmed b. Abdullah ve el-Hâc Hasan b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Ali Çelebi merkūm Mehmed zimmetinde olan meblağ-ı mezbûr dokuz bin akçe hakkını merkūm Mehmed’den kabza mezbûr Ahmed’i bizim huzûrumuzda vekîl eyledi biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr Mehmed’e meblağ-ı mezbûru merkūm Ahmed’e teslîm etmek üzere tenbîh olunup mâ-vaka‘a gıbbe’t-taleb ketb ü sebt olundu. Fi’l-yevmi’s-sâdis ve’l-ışrîn min-Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Pîrî Beşe b. Hüseyin, Mehmed Çelebi b. Hüseyin, Halil Beşe b. Mustafa, el-Hâc Şa‘ban b. Ahmed ve gayruhum mine’l-huzzâr.