Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 346 Hüküm no: 346 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi’nin boşandığı eşi Safiye Hatun ile alacak davasında sulh olduğu Mahmiye-i İstanbul’da Sekbanbaşı Yakub Ağa mahallesinde sâkin İsmail Çelebi b. Hasan meclis-i şer‘-i şerîf-i enverde zevce-i mutallakası olup zâtı ta‘rîf-i şer‘î ile mu‘arrefe olan ba‘isetü hâzihi’l-vesîka Safiye Hatun bt. Abdullah muvâcehesinde ikrâr ve takrîr-i kelâm edip bundan akdem mezbûre Safiye ile zevciyet beynimizde kāime iken mezbûre Safiye yedinden iktirâz ve kabz eylediği otuz guruş ile işbu hâzıra bi’l-meclis câriye-i memlûkesi Fethi bundan akdem marîza oldukda mu‘âcele için mezbûre Safiye’nin emriyle tabibe yirmi beş guruş vermemle cem‘an elli beş guruşu ve ma‘lûmü’l-mikdâr eşyâmı dahi bi-gayr-ı hakkın ketm ü ihfâ etmiş idin deyü taleb ve da‘vâya tasaddî eylediğimde ol dahi cevâbında meblağ-ı mezbûr yüz guruşu ikrâr ve mâ‘adâyı inkâr eylediğinden mâ‘adâ benim dahi zimmetinde mehr-i müeccelimden iki yüz akçe ve eşyâ-i memlûkemden otuz zirâ‘ iplik ve yetmiş üskülü keteni ve bir tepsim bâkī kalmış idi demekle beynimizde ba‘de’l-münâza‘a beynimizde muslihûn tavassut edip da‘vâ-yı mezkûremden beni mezbûre Safiye ile on beş guruş üzerine sulh eylediklerinde ben dahi sulh-ı mezbûru kabûl eylediğimden sonra bedel-i sulh olan meblağ-ı mezbûr on beş guruşu mezbûre Safiye yedinden ahz u kabz edip hukūk-ı zevciyete ve zikr olunan husûslara ve târîh-i kitâba gelince cemî‘ hukūk-ı ma‘lûme ve mechûleye müte‘allıka âmme-i de‘âvî ve kâffe-i mutâlebât ve eymân [ve] muhâsamâtdan her birimiz âharın zimmetini ibrâ ve ıskāt eyledik ba‘de’l-yevm birbirimiz ile kat‘an da‘vâ ve nizâ‘ ve husûmetimiz kalmadı dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min-şehri Rebî‘ülevvel sene 1153. Şuhûdü’l-hâl: Hüseyin Çelebi b. el-Hâc Mehmed, Ahmed Çelebi b. Şa‘bân, Mehmed Çelebi b. Süleyman, Mustafa Çelebi b. Mehmed, Mehmed Çelebi b. Abdullah