Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 347 Hüküm no: 347 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duhancı Mehmed’in varislerinin İmam Süleyman Efendi’deki alacakları ile alakalı davaya sulh bedeli karşılığı son verildiği İbrâ Mahmiye-i İstanbul’da Karabaş mahallesinde sâkin iken bundan akdem vefât eden Bostanlıoğlu demekle arîf Duhâncı Mehmed b. Hüseyin b. Abdullah’ın verâseti zevce-i metrûkesi Zahide bt. Abdullah ile sulbî sagīr oglu Mustafa ve sulbiye kebîre kızları Rukiye ve Hadîce’ye münhasıra olduğu ba‘de’t-tahakkukı’ş-şer‘î sagīr-i mezbûrun vâlidesi ve vasiye-i mansûbesi olup zâtı ta‘rîf-i şer‘î ile mu‘arrefe olan mezbûre Zahide asâleten ve vesâyeten ve yine kendi tarafından asîl ve li-ebeveyn kız karındaşı mezbûre Hadîce tarafından husûs-ı âti’l-beyânda sulh ve ibrâya vekîl olduğu zâtlarını ma‘rifet-i şer‘iyye ile ârifân Halil Çelebi b. Hasan ve ve Ali Çelebi b. Mehmed nâm kimesneler şehâdetleriyle şer‘an sâbit olan mezbûre Rukiye asâleten ve vekâleten meclis-i şer‘-i şerîf-i enverde sâhib-i hâzihi’l-vesîka İmâm Süleyman Efendi b. Zeynelabidin nâm kimesne mahzarında her biri ikrâr-ı tâm ve takrîr-i kelâm edip mûrisimiz müteveffâ-yı mezbûrun merkūm Süleyman Efendi zimmetinde duhân bahâsından elli iki bin yedi yüz yirmi akçe hakkı olup kable’l-ahz vefât ve meblağ-ı mezbûr bizlere mevrûs olmağla hâlâ asâleten ve vekâleten ve vesâyeten mezbûr Süleyman Efendi’den taleb ve da‘vâ eylediğimizde ba‘de vukū‘ü’l-münâza‘âti’l-kesîre sulh, sagīr-i mezbûr hakkında her vechile evlâ ve enfa‘ olmağla beynimizde muslihûn tavassut edip da‘vâ-yı mezkûremizden bizi mezbûr Süleyman Efendi ile yüz yirmi guruş üzerine sulh eylediklerinde biz dahi ber-vech-i muharrer sulh-ı mezkûru kabûl ve sulh olan meblağ-ı mezkûr yüz yirmi guruşu mezbûr Süleyman Efendi yedinden asâleten ve vesâyeten ve vekâleten bi-kadri’l-hısâs bi’t-tamâm ahz u kabz edip mâ‘adâsına ve gayre müte‘allıka âmme-i de‘âvî ve kâffe-i mutâlebâtdan mezbûr Süleyman Efendi zimmetini asâleten ve vekâleten ibrâ-i âm ile ibrâ ve ıskāt eyledik fîmâ-ba‘d mezbûr Süleyman Efendi ile vechen mine’l-vücûh ve sebeben mine’l-esbâb da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 23 S sene 1153. Şuhûdü’l-hâl: İsmail Beşe b. Mehmed, el-Hâc Ali b. İbrahim, Mehmed b. İbrahim, İbrahim b. Ramazan, Molla Mehmed b. İbrahim, es-Seyyid Ahmed b. İbrahim, Mustafa b. Osman, Mustafa b. Mehmed