Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 348 Hüküm no: 349 Orijinal metin no: [52a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin istiğlâl yoluyla Hüseyin Ağa’dan borç aldığı Mahmiye-i İstanbul’da Beyceğiz mahallesinde sâkin el-Hâc Mustafa Efendi b. Mehmed meclis-i şer‘-i hatîr-ı lâzımü’t-tevkīrde işbu râfi‘ü’l-kitâb Hüseyin Ağa b. Şa‘bân mahzarında ikrâr-ı tâm ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Bürüncekci Mehmed Çelebi tasarrufunda olan vakıf menzil ve bir tarafdan ba‘zan Mehmed Emin Ağa tasarrufundaki vakıf menzil ve ba‘zan Fâtıma Hatun tasarrufunda olan vakıf menzil ve bir tarafdan benim tasarrufumda olan vakıf menzil ve bir tarafdan tarîk-i âm ile mahdûd mülk menzil arsa-i hâliyemi cümle tevâbi‘iyle bi-tarîkı’l-istiğlâl mezbûr Hüseyin Ağa’ya üç yüz guruşa bey‘ ve teslîm ol dahi ber-vech-i muharrer iştirâ ve tesellüm edip semeni olan meblağ-ı mezbûr üç yüz guruşu mezbûr Hüseyin Ağa yedinden tamâmen ahz u kabz eylediğimden sonra mezbûr Hüseyin Ağa arsa-i mahdûde-i mezkûreyi ba‘de’t-tahliyti’ş-şer‘iyye ve’t-tekābüzi’l-mer‘î târîh-i kitâbdan bir sene tamâmına değin elli guruşa bana îcâr ve teslîm ben dahi ber-vech-i muharrer istîcâr ve kabûl eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 6 Ra sene 1153. Şuhûdü’l-hâl: Emin Mehmed Ağa b. Mehmed Ağa, Feyzullah Efendi b. Ebubekir Efendi, Mehmed Raşid Efendi b. Ebubekir, fahrü’l-kuzât el-Hâc İsmail Efendi b. Mehmed, fahrü’l-kuzât es-Seyyid el-Hâc Ahmed Efendi Bostanzâde, fahrü’l-müderrisîni’l-kirâm es-Seyyid Mehmed Ma‘sum Efendi La‘lîzâde, es-Seyyid Ömer Efendi b. es-Seyyid Halil