Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 349 Hüküm no: 350 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un kendisini boşayan eşi İsmail’le alacak davasında sulh olduğu Sulh Mahmiye-i İstanbul’da Kumkapı kurbünde Nişancı Paşa mahallesi sâkinelerinden olup zâtı ta‘rîf-i şer‘î ile mu‘arrefe olan Rukiye bt. Ömer nâm hatun meclis-i şer‘-i şerîf-i enverde zevc-i sâbıkı bâ‘is-i hâze’l-kitâb İsmail b. Hüseyin nâm kimesne muvâcehesinde ikrâr ve takrîr-i kelâm edip mezbûr İsmail zevcim olup bundan akdem beni üç def‘a tatlîk etmekle zimmetinde mütekarrer ve ma‘kūdün-aleyh olan üç def‘ada cem‘an üç bin dört yüz akçe mehr-i müeccelim ve nafaka-i iddet-i mu‘ayyene-i ma‘lûmem ve me’ûnet-i süknâmı mezbûr İsmail’den taleb ederim deyü da‘vâya tasaddî etmiş idim, el-hâletü hazihî beynimizde muslihûn tavassut edip da‘vâ-yı mezkûremden beni mezbûr İsmail ile yedi buçuk guruş üzerine inşâ-i akd-i sulh eylediklerinde ben dahi ber-vech-i muharrer sulh-ı mezkûru kabûl ve bedel-i sulh olan meblağ-ı mezbûr yedi buçuk guruşu mezbûr İsmail yedinden tamâmen ahz u kabz eylediğimden sonra mehr-i müeccel-i mezkûrun mâ‘adâsına ve hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 4 Ra sene 1153. Şuhûdü’l-hâl: el-Hâc Mustafa b. el-Hâc Mehmed, Hüseyin Çelebi b. el-Hâc Ahmed, Ahmed b. Şa‘bân