Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 349 Hüküm no: 351 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed’in eşi Mehmed’den muhâlaa yoluyla boşandığı Muhâla‘a Mahmiye-i İstanbul’da İsmail Ağa mahallesinde sâkine ve zâtı ta‘rîf-i şer‘î ile mu‘arrefe olan Emine bt. Mehmed nâm hatun meclis-i şer‘-i şerîf-i enverde râfi‘-i hâzihi’l-vesîka Mehmed b. Abdullah b. Abdurrahman tarafından ikrâr-ı âti’z-zikri tasdîka vekîl olduğu İsmail b. Hüseyin ve Mehmed b. Mustafa nâm kimesneler şehâdetleriyle şer‘a sâbit olan mahalle-i mezbûre imâmı Mehmed Efendi b. Hüseyin muvâcehesinde ikrâr ve takrîr-i kelâm edip müvekkil-i mezbûr Mehmed zevc-i dâhilim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim müvekkil-i mezbûr Mehmed ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezkûru kabûl eylediğinden sonra hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 5 Ra sene 1153. Şuhûdü’l-hâl: İsmail b. Mehmed, Mehmed b. Mustafa, Mustafa b. Hasan, Osman b. Hasan, Mehmed Çelebi b. Abdullah, Hüseyin Çelebi b. el-Hâc Mehmed, Arabzâde el-Hâc Mustafa