Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 350 Hüküm no: 352 Orijinal metin no: [52b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi’nin hacdan dönerken vefat eden Berber Mehmed’e olan borcunu varisi olan Ayşe Hatun’a ödediği Mahmiye-i İstanbul’da Tahtelkale kurbünde Timurtaş mahallesi ahâlîsinden olup bundan akdem hacc-ı şerîfden gelir iken diyâr-ı Mısr-ı Kāhire’de sağr-ı İskenderiye’de vefât eden Berber el-Hâc Mehmed b. Mehmed b. Abdullah’ın zevce-i metrûkesi olup zâtı ta‘rîf-i şer‘î ile mu‘arrefe olan râfi‘atü hâze’l-kitâb Âişe bt. Abdullah nâm hatun meclis-i şer‘-i hatîr-ı lâzımü’t-tevkīrde mahmiye-i mezbûrede Yenibahçe kurbünde Sinan Paşa mahallesinde sâkin Abdullah Çelebi b. Mehmed nâm kimesne mahzarında bi’l-verâse üzerine da‘vâ ve takrîr-i kelâm edip zevcim mezbûr el-Hâc Mehmed b. Mehmed b. Abdullah’ın işbu Abdullah Çelebi zimmetinde cihet-i karzdan altı yüz akçe hakkı olup kable’l-ahz ve’l-istîfâ hacc-ı şerîfden gelir iken târîh-i kitâbdan iki sene mukaddem sağr-ı mezkûrda vefât etmekle meblağ-ı mezbûrdan hisse-i irsiye-i ma‘lûmemi taleb ederim, mezbûr Abdullah Çelebi’ye suâl olunup alıverilmesi matlûbumdur dedikde gıbbe’s-suâl mezbûr Abdullah Çelebi zimmetinde müdde‘iye-i mezbûrenin zevci mezbûr Berber el-Hâc Mehmed’e ol kadar deyni olduğunu ikrâr lâkin mezbûr Berber el-Hâc Mehmed’in fevtini inkâr etmeğin müdde‘iye-i mezbûre Âişe Hatun’dan müdde‘âsına mutâbık beyyine taleb olundukda udûl-ı ahrâr-ı ricâl-i Müslimînden mahmiye-i mezbûrede Muslihiddin mahallesinde sâkin el-Hâc Süleyman b. Yusuf ve mahrûse-i Galata muzâfâtından kasaba-i Tophane mahallâtından Cihangir mahallesinde sâkin Mehmed Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka işbu müdde‘iye-i mezbûrenin zevci Berber el-Hâc Mehmed b. Mehmed b. Abdullah hacc-ı şerîfden gelir iken târîh-i kitâbdan iki sene mukaddem diyâr-ı Mısr-ı Kāhire’de sağr-ı mezkûrda bizim huzûrumuzda vefât edip ve namazını kılıp defn eyledik, bizler bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de ri‘âyet-i şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh müdde‘iye-i mezbûre Âişe Hatun meclis-i şer‘de mezbûr Abdullah Çelebi mahzarında i‘âde-i kelâm edip ânifen edâ ve teslîmine tenbîh-i şer‘î lâhık olan meblağ-ı mezbûr altı yüz akçeden hisse-i irsiye-i ma‘lûmemi mezbûr Abdullah Çelebi yedinden tamâmen ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 Ra sene 1153. Şuhûdü’l-hâl: es-Seyyid Mehmed Ağa b. Ahmed Ağa kethüdâ-yı hazret-i kādı efendi, Ahmed Beşe b. Mustafa tâbi‘-i kethüdâ-yı mûmâ-ileyh, es-Seyyid Mustafa Çelebi b. es-Seyyid Hasan Urfalı, Ali b. Abdullah, Mehmed Beşe b. Ahmed