Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 351 Hüküm no: 353 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir Çelebi’nin Yeniçeri Neferatı Nukud Vakfı’ndan istiğlâl yoluyla borç aldığı İstiğlâl Mahmiye-i İstanbul’da Soğan Ağa mahallesinde sâkin Ebubekir Çelebi b. Mustafa meclis-i şer‘-i hatîr-ı lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerilerinin sekizinci cemâ‘atine mahsûs oda neferâtına mevkūfe nukūda bi’l-fi‘il [mütevellî] olan fahrü’l-eşbâh râfi‘-i hâze’l-kitâb Mehmed Ağa b. Mehmed mahzarında ikrâr-ı tâm ve takrîr-i kelâm edip istiğlâl-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ etrâf-ı selâseden Mehmed Efendi ve Karcı Osman ve Rukiye Hatun menzilleri ve bir tarafdan tarîk-i âm ile mahdûd tûlen ve arzen bi-hesâb-ı terbî‘î yüz yirmi zirâ‘ arsa üzerinde mebnî fevkānî bir bâb oda ve bir sofa ve dehliz ve tahtânî bir bâb oda ve ahur ve kenîf ve havluyu müştemil mülk menzilimi bi-cümleti’t-tevâbi‘ ve’l-levâhık bi-tarîkı’l-istiğlâl mütevellî-yi mezbûr Mehmed Ağa’ya dört yüz guruşa bey‘ ve teslîm ol dahi bi’t-tevliye ber-vech-i muharrer iştirâ ve tesellüm ve kabz ve kabûl edip semeni olan meblağ-ı mezbûr dört yüz guruşu mütevellî-yi mezbûr Mehmed Ağa mâl-ı vakf-ı mezbûrdan bana def‘ ve teslîm ben dahi yedinden tamâmen ahz u kabz eylediğimden sonra mütevellî-yi mezbûr Mehmed Ağa menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzü’l-mer‘î târîh-i kitâbdan bir sene tamâmına değin kırk guruşa bi’t-tevliye bana îcâr ve teslîm eylediğinde ben dahi ber-vech-i muharrer istîcâr ve kabûl eylediğimden sonra gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fî 6 Ra sene 1153. Şuhûdü’l-hâl: Mahmud Beşe Topkapılı, Ahmed Ağa Tekfurdağlı, Odabaşı Hacı Mehmed b. Ömer, İbrahim Odabaşı b. Ömer Ağa, es-Seyyid Mehmed Çelebi b. es-Seyyid Mustafa, Mehmed Beşe b. Ahmed, Nâzır el-Hâc Musa Ağa, el-Hâc Ahmed Ağa, Çadırcı Hasan Çelebi