Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 351 Hüküm no: 354 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa Vakfı’ndan olan arsanın Mahmud’un sahibi olduğu ev ile değiştirilmesinin vakfın yararına olduğuna dair istibdal fermanı İstibdâl fermânıdır A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘ü’l-fazli ve’l-yakīn keşşâfü’l-müşkilâti’d-dîniyye hallâlü’l-mu‘dilâti’l-yakīniye miftâhu künûzi’l-hakāyık misbâhu rumûzi’d-dekāyık el-mahfûfu bi-sınûfi avâtıfü’l-meliki’l-a‘lâ Anadolu kādı‘askerliği pâyesiyle hâlâ İstanbul kādısı olan Mevlânâ Mehmed -edâmallâhu te‘âlâ iclâlehû- tevkī‘-i refî‘-i hümâyûn vâsıl olucak ma‘lûm ola ki kıdvetü’l-emâsil ve’l-akrân Seyyid Mahmud -zîde kadruhû- Südde-i sa‘âdet’ime arzuhâl edip mûmâ-ileyhin mahmiye-i İstanbul’da Kabasakal mahallesinde bâ-hüccet-i şer‘iyye mutasarrıf olduğu menzilinde ashâb-ı hayrâtdan müteveffâ Mehmed Ağa Vakfı’ndan bir mikdâr mukāta‘alı arsası olup ve İstanbul’da Kasım Ağa mahallesinde bir bâb mülk menzili dahi olmağla mülkü olan menzili vakf-ı mezbûrun arsasıyla vakfa enfa‘ olmak üzere mübâdele murâd etmekle keşf ü i‘lâm olunmak bâbında inâyet ricâ ve sâdır olan fermân-ı âlîye imtisâlen savb-ı şer‘-i enverden irsâl olunan mevlânâ keşşâf Hıfzı el-Hâc Mehmed -zîde ilmühû- ve hâssa mimârlarından Şa‘bân ve Süleyman Halîfeler ile mahmiye-i İstanbul’da Kabasakal mahallesi ahâlîsinden sâhib-i arzuhâl es-Seyyid Mahmud menziline varılıp huzûr-ı Müslimînde akd-i meclis-i şer‘-i Nebevîde mezbûr es-Seyyid Mahmud meclis-i ma‘kūd-ı mezkûrda ashâb-ı hayrâtdan müteveffâ Mehmed Ağa Evkāfı’nın meşrûtiyet üzere mütevellîleri olan mahalle-i merkūme imâmı el-Hâc Halil ve müezzini el-Hâc Hasan mahzarlarında vakf-ı mezbûrdan senevî üç yüz akçe mukāta‘a ile tasarrufumda olup işbu müşâhede olunan bir mikdâr arsa menzilim dâhilinde olan evkāf-ı sâire ile mahlût olduğundan mâ‘adâ ba‘de’l-ifrâz binâya dahi tahammülü olmamağla arsa-i mezbûreden rub‘an ve kıymeten evfer olup mahmiye-i mezbûrede Acıçeşme kurbünde Kâtibkasım mahallesinde vâki‘ ma‘lûmetü’l-hudûd ve’l-müştemilât mülk menzilim ile arsa-i merkūme keşf ü takvîm olunup istibdâl cânib-i vakfa her vechile enfa‘ olduğu zâhir oldukda yedime tuğrâ-i garrâ-i sultânî mu‘anven emr-i âlîşân ihsân olunması murâdımdır dedikde mimârân-ı mezbûrân Müslimûn-ı hâzırûn muvâcehelerinde evvelâ vakıf arsa-i mezbûreyi mesâha ve takvîm eylediklerinde tûlen ve arzen bi-hesâb-ı terbî‘î otuz üç [zirâ‘] olup beher zirâ‘ı ikişer yüz kırk akçeden yedi bin dokuz yüz akçeye bâliğ ve sâniyen mülk menzil-i mezbûru mesâha ve takvîm eylediklerinde arsası tûlen ve arzen bi-hesâb-ı terbî‘î doksan bir zirâ‘ beher zirâ‘ı yüz akçeden dokuz bin yüz akçe ve üzerinde olan ebniyesi tûlen ve arzen bi-hesâb-ı terbî‘î kırk beş zirâ‘ beher zirâ‘ı ikişer yüz kırkar akçeden on bin dokuz yüz yirmi akçeye bâliğ olmağla mülk olan menzil cevdeten ve kıymeten ve şerâfeten arsa-i merkūmeden evfer ve ezyed ve yevmî bir akçe icâreye tahammülü olmağın istibdâl her vechile hayırlı olduğunu mimârân-ı mezbûrân ve Müslimûn-ı hâzırûn ba‘de’l-ihbâr şerâit-i istibdâl mevcûde ve mezbûr es-Seyyid Mahmud -zîde kadruhû- istibdâl için emr-i şerîf-i âlîşân verilmek bâbında sen ki mevlânâ-yı müşârün-ileyhsin i‘lâm eylediğin ecilden i‘lâmın mûcebince istibdâl olunmak emrim olmuşdur buyurdum ki, emr-i şerîfim vusûl buldukda bu bâbda sâdır olan emrim üzere amel dahi i‘lâmın mûcebince mülk olan menzil-i merkūm vakıf olan arsa-i merkūmeden rub‘an ve kıymeten evfer olup istibdâl her vechile vakfa evlâ ve enfa‘ olmağla istibdâli tecvîz eden fukahâ-yı zevi’l-ibtihâcın kavilleri üzere zikr olunan mülk menzil vakıf ve vakıf olan arsa mülk olup vakf-ı evvelin şurûtu vakf-ı sânîde icrâ olunmak üzere istibdâl eyleyip tarafına hüccet veresin şöyle bilesin alâmet-i şerîfe i‘timâd kılasın. Tahrîren fî evâsıtı Saferi’l-hayr sene selâse ve hamsîn ve mi’e ve elf. Kostantıniyye el-mahmiye