Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 328 Hüküm no: 475 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başbaltacı Selim Ağa’nın vârislerinden Ayşe’nin terekeden hakkını vekili vasıtasıyla aldığı Husûs-ı âti’r-rakīmi mahallinde ketb ü terkīm olunması için bi’l-iltimâs irsâl olunan mevlânâ Abdulkādir Efendi hadâik-i sultâniyeden hâsbağçede Sinan Paşa Köşkü mukābelesinde köşk bekçisi İbrahim Bey odasına varıp zeyl-i kitâbda isimleri mastûr olan Müslimîn huzurlarında akd eylediği meclis-i şer‘-i şerîfde fi’l-asl vilâyet-i Rumeli’nde Hersek sancağında Blagay kazâsına tâbi‘ Variçe nâm karyeden olup bundan akdem fevt olan Başbaltacı Selim Ağa b. Hüseyin’in verâseti zevce-i metrûkesi Âişe bt. Hasan Usta’ya ve karye-i mezbûrede sâkine vâlidesi Âişe bt. Fâik sipâhîye ve sulbî oğlu Mehmed ve sulbiye kızı Afife nâm sagīrlere münhasıra olduğu şer‘an müte‘ayyen oldukdan sonra mezbûre Âişe bt. Fâik sipâhî tarafından mevrûsu müteveffâ-i mezbûrun muhallefâtından isâbet eden südüs hakkını da‘vâ ve talebe ve ahz u kabza ve kendüye îsâle ve lede’l-hükkâmi’l-kirâm kabz ve îsâle mütevakkıf olan umûra ve ibrâya vekîl olup vekâleti hasm-ı câhid-i şer‘î mahzarında bi’l-fi‘il kazâ-i mezbûre kādısı olan Behlül Efendi kıbelinden vârid olup mezbûrun imzâ ve hatemi müştemil târîh-i kitâb senesi Receb’inin gurresiyle müverrah Muharrem Beşe b. Veli ve Mehmed Beşe b. Abdullah şehâdetleri ile vürûdu müsbit olan nakl-i sahîh-i şer‘î ile sâbite olan el-Hâc Abdullah Bey b. Ca‘fer meclis-i mezbûrda müteveffâ-i mezbûrun zevcesi merkūme Âişe tarafından ikrâr-ı âti’l-beyânı tasdîka vekîl-i şer‘îsi ve sıgārân-ı mezbûrânın tesviye-i umûrlarına cânib-i şer‘den mansûb vasîleri olup müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb mezbûr Hasan Usta mahzarında ikrâr ve takrîr-i kelâm edip müteveffâ-i mezbûrun muhallefâtından ber-mûceb-i defter-i kassâm müvekkile-i mezbûreme südüs hakkı mukābelesinde isâbet eden altmış dört bin beş yüz elli beş akçeyi ve müteveffâ-i mezbûrun zikr olunan Variçe ve Enbekce? nâm karyelerde olup vasiyy-i mezbûr hâlen müvekkile-i mezbûreye semen-i misli ile bey‘ eylediği sagīrân-ı mezbûrâna menfa‘ati olmayan emlâkin semenleri olan dokuz bin akçenin dahi südüsü olan bin beş yüz akçeyi ki cem‘an altmış altı bin elli beş akçeyi vasiyy-i mezbûr Hasan Usta yedinden vekâletim hasebiyle bi’t-tamam ve’l-kemâl ahz u kabz eyledim müvekkile-i mezbûrenin min-ba‘d bir akçe ve bir habbe hakkı kalmayıp, müteveffâ-i mezbûrun celîl ü hakīr ve kalîl ü kesîr ism-i mâl ıtlâk olunur muhallefâtına müte‘allik cemî‘ da‘vâ ve mutâlebât ve eymân ve muhâsamâtdan sagīrân-ı mezbûrânın ve merkūme Âişe Hatun’un zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîk ve’t-taleb vâki‘ hâli mevlânâ-yı mezbûr mahallinde tahrîr ve ba‘dehû cânib-i şer‘den varan Mehmed b. Abdullah ve Hasan Beşe b. Abdullah ile gelip herbiri vukū‘u üzere inhâ ve takrîr etmeğin mâ-vaka‘a bi’t-taleb ketb olundu. Fî-evâhiri Zilka‘deti’ş-şerîfe li-sene erba‘a ve sittin ve elf. Şuhûdü’l-hâl: Süleyman Bey b. Muslı, Halil Bey b. Ahmed, Salih Beşe b. Ahmed, Ali Bey b. Durak, İbrahim Bey b. Muslı ve gayruhum mine’l-huzzâr.