Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 353 Hüküm no: 355 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Sefer’in eşi Mustafa’dan muhâlaa yoluyla boşandığı Muhâla‘a Cera’l-emru kemâ rukime fîhi nemekahû el-fakīr ileyhi azze şânühû Mehmed b. Mehmed el-müvellâ hilâfeten bi-medîneti Kostantıniyye -gufira lehümâ- Mahmiye-i İstanbul’da Dülgerzâde mahallesi sâkinelerinden olup zâtı Yusuf b. Hasan ve Ahmed b. Mustafa nâm kimesneler ta‘rîfleriyle mu‘arrefe olan Havva bt. Sefer nâm hatun meclis-i şer‘-i şerîf-i enverde zevc-i dâhili işbu râfi‘ü’l-kitâb Mustafa b. Sefer nâm kimesne mahzarında ikrâr-ı tâm ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan yirmi guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere mezbûr Mustafa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyete müte‘allıka âmme-i da‘vâdan her birimiz âharın zimmetini ibrâ-i âmm-ı katı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Ra sene 1153. Şuhûdü’l-hâl: Ali Çelebi b. Abdullah, Mustafa b. Mehmed, İbrahim b. Halil, Hüseyin Çelebi b. el-Hâc Mehmed, Mustafa b. Musa