Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 355 Hüküm no: 358 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi’nin kuyumcu dükkânlarını Osman Ağa’ya sattığı (bey’ bi’l-vefâ) Ceryü’l-mübâya‘ati’ş-şer‘iyye vaka‘a ledeyye el-fakīr ileyhi azze şânühû Mehmed b. Mehmed el-müvellâ hilâfeten bi-Dârü’s-saltanati Kostantıniyye el-mahmiye -gufira lehümâ- Bey‘ bi’l-vefâ Dârüssaltanatü’l-aliyye Kostantıniyyetü’l-mahmiyede vâki‘ yağlıkçı hırfetinden Ahmed Çelebi b. Ahmed Efendi nâm kimesne meclis-i şer‘-i şerîf-i Ahmedî sallallâhü te‘âlâ alâ şâri‘ihâda bâ‘is-i hâzihi’l-vesîka zahrü’l-eşbâh Osman Ağa b. Ahmed b. Abdullah tarafından ikrâr-ı âti’z-zikri tasdîka vekîl olduğu es-Seyyid Ali Çelebi b. İsmail ve İbrahim Çelebi b. Halil şehâdetleriyle ber-nehc-i şer‘î sâbit olan Ali Ağa b. el-Hâc İbrahim muvâcehesinde ikrâr-ı tâm ve takrîr-i kelâm edip arsasının senevî Hüsrev Efendi Vakfı’na dört yüz seksen akçe mukāta‘ası olup ebniyesi yedimde mülk ve hakkım olan mahmiye-i merkūmede kuyumcular sûkunda sıra odaları demekle ma‘rûf mahalde vâki‘ ma‘lûmü’l-hudûd biribirine muttasıl altı bâb kuyumcu dükkânlarımın ebniye-i memlûkesini cemî‘ tevâbi‘ ve levâhıkıyla bey‘ bi’l-vefâ tarîkı üzere târîh-i vesîkadan müddet-i ma‘lûmeye değin müvekkil-i mezbûr Osman Ağa’ya iki bin guruşa bey‘ ve teslîm ve arsalarını dahi mütevellî-yi vakf-ı mezbûr ma‘rifetiyle ferâğ ve tefvîz eylediğimde ol dahi ber-vech-i muharrer iştirâ ve tesellüm ve tefevvüz ve kabûl eyledikden sonra semen-i mebî‘-i mezbûr iki bin guruşu tamâmen müvekkil-i mezbûr Osman Ağa yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis min-şehri Rebî‘ülevvel li-sene selâse ve hamsîn ve mi’e ve elf min-hicreti men-lehü’l-izzü ve’ş-şeref. Şuhûdü’l-hâl: es-Seyyid Ali Çelebi b. es-Seyyid İsmail, Salih Ağa b. Süleyman, İbrahim Çelebi b. Halil, el-Hâc Mustafa Arabzâde, Ahmed Çelebi b. Şa‘bân